ԵՐԵՎԱՆ, 15 նոյեմբերի — Sputnik. Հայտնի մարզիկ Աշոտ Բոլյանը «օրենքով գող» Անդրանիկ Հարությունյանի` Մասիվցի Անդիկի սպանությունը կազմակերպել է դրամական հարցերի պատճառով։ Այս մասին գրում է «Ժողովուրդ» օրաթերթը։
«Բռնցքամարտիկ Բոլյանը 300-350 հազար դոլար պարտք է եղել մի հայտնի խաղատանը։ Տերերը չեն կարողացել Բոլյանից գումարը ստանալ և դրա համար դիմել են Անդրանիկ Հարությունյանին, որպեսզի նա «ստանա» փողը: Ահա սա է եղել Բոլյանի` Անդիկի սպանությունը կազմակերպելու շարժառիթը»,– գրում է թերթը։
Հիշեցնենք, որ թայբոքսինգի աշխարհի չեմպիոն, Հայաստանում ծնված Աշոտ Բոլյանին նոյեմբերի 13–ին սպանել էին Մոսկվայի Նախիմովսկի պողոտայում գտնվող բնակելի տան մերձակայքում, իր Infiniti մակնիշի ավտոմեքենայի մոտ։ Մարմինը հայտնաբերել էր տեղի բնակիչներից մեկը։
Ավելի վաղ` հուլիսի 3-ի ուշ երեկոյան Երևանի Նոր Նորքի 5-րդ զանգվածի շենքերից մեկի բակում սպանել էին Մասիվցի Անդիկին: Քննչական կոմիտեն հայտնել էր, որ հրազենային վնասվածք պատճառողը ՌԴ Գրոզնիի շրջանի մի բնակիչ է։
«Ժողովուրդ» օրաթերթը նշում է, որ աղմկահարույց սպանությունից հետո հարուցված քրեական գործով հիմնավորվել է, որ Ա. Հարութունյանի սպանության կազմակերպիչը բռնցքամարտի աշխարհի եռակի չեմպիոն Աշոտ Բոլյանն է:
«Սպանողը պրոֆեսիոնալ է եղել». մանրամասներ և տեսանյութ մարզիկ Աշոտ Բոլյանի սպանությունից
