ԵՐԵՎԱՆ, 14 նոյեմբերի – Sputnik. Վերջին 5-6 ամիսներին gg ծառայությունն աշխատել է գերծանրաբեռնված ռեժիմով։ Այս մասին Sputnik Արմենիայի հետ զրույցում ասաց gg թիմի տնօրեն Քնարիկ Գրիգորյանը` մեկնաբանելով ուղևորափոխադրումների սակագները բարձրացնելու որոշումը։
Ինչպես են «Զվարթնոցի» տաքսիստները խաբել օտարերկրացիներին. տեսանյութ
«Այդ ընթացքում մեր բազմաթիվ օգտատերերի չենք կարողացել սպասարկել և այնպես է ստացվել, որ հասանելիությունն իջել է»,– ասաց նա։
Քնարիկ Գրիգորյանի խոսքով` ծառայությունը վերջին ամիսներին ավտոմեքենաներով վարորդների սակավության խնդիր է ունեցել, ինչի հետևանքով բազմաթիվ պատվերներ անպատասխան են մնացել։
«Մենք այս պահին ունենք շուրջ 3000 գործընկերոջ կարիք, որոնք կներգրավվեն մեր մեծ թիմում ու կիրականացնեն համակարգում եղած պատվերները»,– ասաց Գրիգորյանը։
Ինչ վերաբերում է սակագներին, թիմի տնօրենը հայտնեց, որ gg–ի հիմնական սակագները մնալու են անփոփոխ և փոփոխվելու են միայն չափազանց ծանրաբեռնված ժամերին` կախված պատվերների քանակից։
«Այսինքն` եթե մենք ապահովենք մեր ցանկալի գործընկներների թիվը, հնարավոր է, որ սակագնի տատանում չլինի, մնա նույնը»,– ասաց Քնարիկ Գրիգորյանը։
Նշենք, որ հերթական թանկացման հարցով Sputnik Արմենիան դիմեց նաև Տնտեսական մրցակցության պաշտպանության պետական հանձնաժողով։ Այստեղից մեզ հայտնեցին, որ gg-ի թանկացման խնդրով չեն զբաղվում։ «ՏՄՊՊՀ- ն այս պահին ուսումնասիրություններ չի իրականացնում տաքսի ծառայությունների մատուցման ոլորտում, և հանձնաժողովում առկա չէ որևէ բողոք կոնկրետ տնտեսվարող սուբյեկտի վերաբերյալ»,– ասացին հանձնաժողովից։
Հիշեցնենք` սակագների բարձրացման մասին gg ծառայությունն օգտատերերին տեղեկացրել էր երեկ` նոյեմբերի 13-ին։ Օրվա պիկ ժամին` 18։00 - 19։ 00–ի ժամանակահատվածում «gg Էկոնոմ» ծառայության նվազագույն արժեքը հասել էր 800–900 դրամի` նախկին 500-ի փոխարեն, «gg» ծառայության արժեքը` 900-1000 դրամի` նախկին 600–ի փոխարեն։
Ուղևորափոխադրումների թանկացման մասին ծառայության բջջային հավելվածից օգտվող հաճախորդները տեղեկացել էին հավելվածով ստացած նամակներից։
Գերմանիայում 5-տեղանոց անվարորդ թռչող տաքսի են փորձարկել. տեսանյութ
Ի դեպ, gg–ն բջջային հավելվածով Հայաստանում գործող թերևս միակ օնլայն ծառայությունն էր, որը մինչև նոյեմբերի 13-ը օրվա ժամից անկախ` չէր բարձրացնում ծառայության նախնական արժեքը։
Բջջային մյուս հավելվածները` «Յանդեքս» ու «U» տաքսիներն արդեն շուրջ մեկ տարի, օրվա պահանջարկված ժամերին, անբարենպաստ եղանակներին ու խիտ խցանումների ժամանակ ավելացնում են սակագները։
Եթե «Յանդեքսի» նվազագույն սակագինը սահմանված է 300 դրամ, ապա վերոհիշյալ դեպքերում այն կարող է հասնել 1000 դրամի, իսկ «U»–ն նվազագույն 400 դրամի փոխարեն այդ ժամերին հաճախորդներից 7-8 հարյուր դրամ է պահանջում։
