ԵՐԵՎԱՆ, 12 նոյեմբերի — Sputnik. Հայկական բաստուրման Ռուսաստան արտահանելու սահմանափակումներ գրեթե չկան։ Այս մասին Sputnik Արմենիայի թղթակցին հայտնեց Հայաստանի Սննդամթերքի անվտանգության պետական ծառայության որակի հսկողության տեսչության պետ Վահե Դանիելյանը։
2015թ–ի դեկտեմբերին Հայաստանում դաբաղի նոր տեսակի բռնկումից հետո Ռուսաստանը ժամանակավորապես սահմանափակել է առանց ջերմամշակման հայկական մսամթերքի, այդ թվում` բաստուրմայի և սուջուխի ներկրումը։ 2016թ–ի հունվարին Հայաստանի իշխանությունը Ռուսաստանից ստացել է հատուկ մշակված պատվաստանյութ, որը բաժանել են գյուղացիներին։
Պատվաստումից հետո արգելքը հանվել է և պահպանվում է միայն Ռուսաստանի որոշ շրջաններում։ Այնտեղ, որտեղ խոշոր եղջերավորների հիվանդությունների հետ կապված իրավիճակն այդքան բարեհաջող չէ, հում մսամթերքի ներկրումը սահմանափակում են բացառապես ապահովության նպատակով։ Հայկական արտադրանքը հեշտությամբ առաքում են Ռուսաստանի մնացած շրջաններ։
Արտահանմանը մասնակցելու համար անհրաժեշտ է մտնել թույլատրված արտադրողների ռեեստրի մեջ, որը կազմում է հայկական կողմը, ավելի կոնկրետ` ՍԱՊԾ–ը։
Ինչպես ԵԱՏՄ–ում բիզնեսն ազատել հարկային խնդիրներից. Հայաստանն իր մոտեցումն է առաջարկում
«Դրա համար պետք է դիմում ներկայացնել։ Մենք ստուգում ենք փաստաթղթերը, իսկ հետո արտադրությունը. այն պետք է իրականացնել միության միասնական սանիտարական պահանջներին համապատասխան։ Եթե մենք համոզվում ենք, որ ամեն ինչ կարգին է, ընկերությունը ներառում են ռեեստրում և դրա մասին տվյալները փոխանցում Ռուսաստանում և ԵԱՏՄ մյուս երկրների մեր գործընկերներին», – ասաց Դանիելյանը։
Այժմ այդ ռեեստրում ներառված են ավելի քան 300 ձեռնարկություններ Հայաստանից` մսամթերք և կաթնամթերք, ինչպես նաև անասունի և ձկան համար կեր արտադրողներ։ Մի քանի ընկերությունների համար ուժեղացվել է լաբորատոր հսկողությունը կամ թույլտվությունը ժամանակավորապես դադարեցվել է։
Նշենք, որ 2018թ-ին Հայաստանն ավելացրել է երշիկեղենի արտահանումը, ներառյալ բաստուրմայի և սուջուխի։ Արտահանման բացարձակ ծավալները մեծ չեն` 234 տոննայից ավելացել է մինչև 380 տոննա։ Ընդլայնվել է նաև արտահանման աշխարհագրությունը, այդ թվում` ԵԱՏՄ երկրներում. 5,5 տոննա առաջին անգամ արտահանվել է Ղազախստան, 4,1 տոննա` Ղրղըզստան։ Մոտավորապես 0,5 տոննա ուղարկվել է հարևան Ուզբեկստան, իսկ ավելի քան 2 տոննան` Արաբական Էմիրություններ։ Արտահանումը Ռուսաստան 5 տոննայից դարձել է 38 տոննա։ Ամենախոշոր շուկան Վրաստանն է. արտահանումը այս երկիր 225 տոննայից հասել է 289 տոննայի։
