ԵՐԵՎԱՆ, 11 նոյեմբերի — Sputnik. Սեփական զինվորներին Սիրիա ուղարկելով` Ռուսաստանը պաշտպանում է իր ժողովրդին, քանի որ ահաբեկչության գաղափարախոսությունը քաղաքական սահմաններ չի ճանաչում։ RT–ի հետ հարցազրույցում այս մասին ասել է Սիրիայի նախագահ Բաշար Ասադը։
Նա կարծում է, որ նույնիսկ Սիրիայում ոչ ոք իր կյանքը մյուսի համար հենց այնպես չէր զոհաբերի։ Ասադը վստահ է, որ մարդիկ պատրաստ են մահվան գնալ հանուն ինչ–որ գործի, իսկ ավելի կոնկրետ` այդ գործը սեփական երկրի ու ապագայի պաշտպանությունն է։
«Եվ հատկապես ուրիշ երկրից եկած մարդն իր կյանքը չի զոհաբերի միապետի կամ ոչ միապետի համար։ Որ նախագահ Պուտինը մարդկանց ուղարկի մահանալու որևէ մեկ մարդու համար կամ ռիսկի տակ դնի իր երկրի շահերը այդ մարդու համար, պարզապես դուրս է տրամաբանությունից», – ասել է նա։
Գրիգորյան. «Սիրիայի ներքաղաքական կայունությունը մեզ համար ունի շատ կարևոր նշանակություն»
Վերլուծելով Ռուսաստանի պաշտոնյաների հայտարարությունները` Ասադը եզրահանգել է, որ իրենց զինվորներին Սիրիա ուղարկելով` նրանք պաշտպանում են սեփական շահերը։
«Այստեղ գործոններից մեկն այն է, որ մի այլ երկրում (լինի դա Սիրիան կամ մեկ այլ պետություն) ահաբեկչության դեմ պայքարը կօգնի պաշտպանել ռուս ժողովրդին, քանի որ ահաբեկչությունն ու դրա գաղափարախոսությունը քաղաքական սահմաններ չեն ճանաչում։ Ահաբեկչության համար ամբողջ աշխարհն է արենա», –նշել է նախագահը։
Երկրորդ պատճառը, նրա խոսքով, իրավունքի միջազգային նորմերի իրականացումն է։ Ասադը կարծում է, որ այդ նորմերի պահպանումը կապված է Ռուսաստանի ազգային շահերի հետ։ Այսինքն` միջազգային իրավունքի նորմերի իրականացումն աշխարհում նպաստելու է ռուս ժողովրդի շահերին։
«Այսպիսով` նրանց գործողությունները հարաբերակցվում են իրենց ազգային շահերի, գլոբալ կայունության, նաև Սիրիայի շահերի ու Սիրիայի կայունության հետ», – ամփոփել է Ասադը։
Նա նաև հույս է հայտնել, որ Ռուսաստանը, Իրանն ու Չինաստանը կմասնակցեն Սիրիայի վերականգնմանը։ Ասադը չի բացառում, որ դա ուզածի չափ արագ չի հաջողվի անել, քանի որ այժմ Սիրիայի հանդեպ էմբարգո է գործում, ու ԱՄՆ–ն խոչընդոտում է նոր ներդրումները։
«Ամերիկացիները վերջին երկու տարում արել են ամեն ինչ, որպեսզի խոչընդոտեն ոչ միայն իրավական, այլև այն ֆիզիկական անձանց մուտքը, որոնք ուզում են ներդրում անել Սիրիայում։ Նրանց ասում էին, որ դուք էլ էմբարգոյի տակ կընկնեք։ Այնպես որ ներդրողներից շատերը վախենում են կապիտալ ուղղել Սիրիա։ Սակայն սա ամենամեծ խնդիրը չէ։ Երկրի վերականգնման համար մարդկային պաշարները մեզ մոտ բավարար են, հավելյալի կարիք չկա։ Վերականգնումը կարելի է աստիճանաբար իրականացնել», – ասել է նա։
Նշենք, որ զինված հակամարտությունը Սիրիայում սկսվել է 2011 թվականին։ Դրա կարգավորմանն ակտիվորեն միացել են Ռուսաստանը, Իրանը, Թուրքիան, որոնք հաշտեցման երաշխավորներն են։ Այս ընթացքում Սիրիային հաջողվել է գրեթե ամբողջությամբ հաղթել ահաբեկիչներին, քաղաքական կարգավորում սկսել, վերադարձնել փախստականներին ու սկսել վերականգնել ռազմական ենթակառուցվածքը։ Սահմանադրական կոմիտե է ստեղծվել, որում ներառվել է նաև ընդդիմությունը։ Կոմիտեի առաջին նիստն անցկացվել է հոկտեմբերի 30–ին Ժնևում։
Նրանք ինտեգրվել են, բայց չեն ձուլվել. Բաշար Ալ–Ասադը խոսել է սիրիահայերի մասին
