ԵՐԵՎԱՆ, 8 Նոյեմբեր – Sputnik. Ռուսական կողմի նկատմամբ Ադրբեջանի ԱԳՆ–ի բողոքի նոտան և մեկնաբանություններն անհիմն են, իսկ ընդհանուր տոնայնությունը չի համապատասխանում ռուս–ադրբեջանական հարաբերությունների մակարդակին և որակին։ Այս մասին գրված է Ադրբեջանի ԱԳՆ բողոքի նոտայի վերաբերյալ ՌԴ ԱԳՆ հայտարարության մեջ։
Նոյեմբերի 6-ին Ադրբեջանը Ռուսաստանին բողոքի նոտա էր հղել ՌԴ դեսպանին` Արցախի ԱԳ նախարար Մասիս Մայիլյանի և մշակույթի, երիտասարդության հարցերի և զբոսաշրջության նախարար Լեռնիկ Հովհաննիսյանի` Մոսկվա կատարած այցի համար։ Ադրբեջանում Ռուսաստանի Դաշնության դեսպան Միխայիլ Բոչարնիկովին հրավիրել էին երկրի արտաքին գերատեսչություն, որտեղ էլ նրան հանձնել էին բողոքի նոտան։
«Նշված անձանց այցը բացառապես մասնավոր բնույթ է կրել։ Որպես այդպիսին` այն չի հակասում ո՛չ ռուսական օրենսդրությանը, ո՛չ առկա միջազգային պայմանավորվածություններին, ո՛չ Ռուսաստանի միջնորդական առաքելությանը ԼՂՀ կարգավորման հարցում։ ՌԴ պաշտոնական այրերի հետ որևէ հանդիպում չի անցկացվել», –գրված է Ռուսաստանի արտաքին քաղաքական գերատեսչության մեկնաբանության մեջ։
Ինչ վերաբերում է Մոսկվայում ԼՂՀ ներկայացուցչությունում տեղի ունեցած հանդիպումներին, ապա, ինչպես նշում են ԱԳՆ–ում, նման «ներկայացուցչություն», որպես սուվերեն պետության դիվանագիտական առաքելություն, գրանցված չէ երկրի պետական մարմիններում։
«Մենք հետագայում ևս նպաստելու ենք ԼՂՀ կարգավորմանը, ինչպես ԵԱՀԿ ՄԽ համանախագահների կազմում, այնպես էլ ազգային տեսանկյունից, հաշվի առնելով մեր հարաբերությունները Հայաստանի և Ադրբեջանի հետ», – գրված է հայտարարության մեջ։
Մոսկվայում ներկայացրել են Արցախում արված կտավները. ներկա էին Մայիլյանն ու Տողանյանը
Նշենք, որ Մասիս Մայիլյանն աշխատանքային այցով Մոսկվա էր մեկնել նոյեմբերի 4–ին։
Ավելի վաղ Ադրբեջանը Ռուսաստանին բողոքի նոտա էր հղել ՌԴ դումայի պատգամավոր Կոնստանտին Զատուլինի` Արցախ կատարած այցի հետ կապված։
