ԵՐԵՎԱՆ, 6 նոյեմբերի — Sputnik. ՀՀ առողջապահության նախարարությունը քննարկում է 2020 թվականից «Շտապօգնության» աշխատակիցների աշխատավարձերի բարձրացման հարցը։ Sputnik Արմենիայի թղթակցի հետ զրույցում այս մասին ասաց «Շտապօգնություն» ՓԲԸ–ի ղեկավար Թագուհի Ստեփանյանը։
Այժմ շտապօգնության բժիշկը մեկ հերթապահության համար 18 հազար դրամ է ստանում, բուժքույրը` 11 հազար, իսկ վարորդը` 10 հազար։ Բժիշկներն ամսական 6–7 հերթապահություն են ունենում (մեկ հաստիք) կամ 3–4 հերթապահություն (կես հաստիք)։ Ստացվում է` ամբողջական հաստիքով աշխատող բժիշկն ամսական 126 հազար դրամ աշխատավարձ է ստանում։
Ստեփանյանը նշեց, որ ծառայության աշխատակիցներին արդեն սոցփաթեթներ ու առողջապահական ապահովագրություն են տրամադրում։ Ավելացել է նաև բրիգադների թիվը։ Մինչ օգոստոս Երևանում 38 բրիգադ էր գործում, այսօր դրանց թիվը հասել է 53–ի։ Հետևաբար բրիգադների աշխատանքը թեթևացել է։
Ոչ բոլոր նախարարների ու փոխնախարարների աշխատավարձերն են բարձրացել, կան նաև նվազումներ
«Ստանդարտը փոխվել է. եթե նախկինում մեկ բրիգադը սպասարկում էր Երևանում 30 հազար մարդու, ապա հիմա` 20 հազար։ Դա զգալիորեն թեթևացրել է շտապօգնության մեքենաների աշխատանքը», – նշեց նա։
Ստեփանյանը հուսով է, որ Արսեն Թորոսյանի խոստացած էլեկտրոնային համակարգը, որի շնորհիվ շտապօգնության բրիգադները կկարողանան տեղեկություններ ստանալ հիվանդանոցներում վերակենդանացման բաժանմունքներում եղած ազատ տեղերի մասին, նույնպես զգալիորեն կհեշտացի բրիգադների աշխատանքը։ Նոր համակարգը կթեթևացնի շտապօգնության աշխատակիցների ու բուժհաստատությունների շփումը։ Հիվանդներին այլևս վերակենդանացման բաժանմունքում ազատ տեղերի բացակայության պատճառով մի հիվանդանոցից մյուսը չեն տեղափոխի։
Նշենք, որ այս տարվա առաջին կիսամյակում «Շտապօգնությունը» 130 545 կանչ է գրանցել։ Սա 7761–ով գերազանցում է նախորդ տարվա հունվար–հունիս ամիսների ցուցանիշը։ Հիվանդներին օգնություն ցուցաբերելու նոր ծրագրերի համար 2020 թվականին 4,3 միլիարդ դրամ կտրամադրվի։ Սա մեկ միլիարդով գերազանցում է այս տարվա բյուջեով տրամադրված գումարը։
Նախորդ տարվա օգոստոսի 30–ին ՀՀ կառավարությունը Չինաստանի կառավարությունից շտապօգնության մեքենաներ էր նվեր ստացել 2018 թվականի մարտի 23–ին Հայաստանի ու Չինաստանի միջև կնքված պայմանագրի շրջանակում։ Ընդհանուր առմամբ Հայաստանին շտապօգնության 200 մեքենա է փոխանցվել, այդ թվում` 65 ռեանիմոբիլ։
Ի՞նչ է կատարվել իրականում. Կարապետյանը բացատրում է աշխատավարձերի գաղտնի բարձրացումը
