ԵՐԵՎԱՆ, 3 նոյեմբերի — Sputnik. Իրանի գերագույն հոգևոր առաջնորդ այաթոլլա Ալի Համենեին դեմ է արտահայտվել ԱՄՆ-ի հետ բանակցություններին՝ նշելով, որ ամերիկացիները նոր պահանջներ են առաջադրում։
Ինչպես նշել է այաթոլլա Համենեին, երկրի ղեկավարության գլխավոր նպատակն է թույլ չտալ ԱՄՆ-ի «քաղաքական ներխուժումը» Իրան։
«Բանակցություններից հրաժարվելն այդ ներթափանցումն արգելափակելու միջոց է։ Դա նշանակում է, որ աշխարհում կա ազգ, որը չի ընդունում ԱՄՆ-ի բռնատիրությունը և բռնակալությունը», - գրել է Իրանի գերագույն առաջնորդը Twitter-ի իր էջում։
Նրա կարծիքով՝ ԱՄՆ-ը ձգտում է Իրանում վերականգնել դիրքերը, որոնք զբաղեցրել է մինչև իսլամական հեղափոխությունը, բայց դա նրան չի հաջողվի։
«Իսլամական հանրապետությունն ունի ամուր, երկաթե կամք։ Դա թույլ չի տա ԱՄՆ-ին վերադառնալ Իրան», - ասել է Համենեին։
Հոգևոր առաջնորդի խոսքով, եթե Թեհրանը համաձայնի բանակցություններ վարել Վաշինգտոնի հետ, ապա դրանից ոչինչ չի շահի, քանի որ ԱՄՆ-ը մշտապես նոր պայմաններ է առաջադրում, այդ թվում՝ հրթիռների մասով։
The U.S. demands are endless. The U.S. seeks the position it had before the #IslamicRevolution, but the Revolution and the Islamic Republic are stronger than this. The Islamic Republic has a firm, iron will. It won’t let the U.S. return to #Iran. pic.twitter.com/JAC1aWOJhy
— Khamenei.ir (@khamenei_ir) November 3, 2019
Նշենք, որ ԱՄՆ–ի և Իրանի միջև հարաբերությունները սրվել են 2018թ.–ի մայիսին, երբ Վաշինգտոնը դուրս է եկել «միջուկային գործարքից»։ ԱՄՆ իշխանությունները կոշտ պատժամիջոցներ են սահմանել և շարունակում են ուժեղացնել ճնշումը։ ԱՄՆ–ը նաև Իսլամական հեղափոխության պահապանների կորպուսն է հայտարարել ահաբեկչական կազմակերպություն։ Դրան ի պատասխան` Իրանը ԱՄՆ Զինված ուժերի կենտրոնական հրամանատարությունը ճանաչել է որպես ահաբեկչական կազմակերպություն, իսկ ԱՄՆ–ը` «ահաբեկչությունը հովանավորող պետություն»։
«Իրականում». ԱՄՆ-ի թիրախը Իրանն է դառնում. Հարավային Կովկասում իրավիճակը կլարվի
