ԵՐԵՎԱՆ, 1 նոյեմբերի – Sputnik. «Կամք» նախաձեռնությունը Ստամբուլյան կոնվենցիայի դեմ բողոքի ակցիա է կազմակերպել Երևանում։
Վերջին օրերին այս կոնվենցիայի շուրջ կրքերը կարծես խաղաղվել էին, սակայն երբ հայտնի դարձավ, որ ԵԽ բարձրաստիճան պաշտոնյաների մասնակցությամբ ԱԺ–ում լսումներ են անցկացվելու այդ թեմայով, ակտիվիստները կրկին փողոց են դուրս եկել։ Նրանք վստահեցնում են, որ կոնվենցիան սպառնալիք է ազգային արժեքների համար։
Նախաձեռնության ղեկավար Վահագն Չախալյանի խոսքով` տասնյակ հազարավոր քաղաքացիներ պատրաստ են ոտքի կանգնել և անհնազանդության ակցիաներ իրականացնել Հայաստանի տարբեր քաղաքներում։
«Մենք ասում ենք, որ դրա կարիքն այս պահին չկա, քանի դեռ փաստաթուղթը չի մտել վավերացման: Իսկ եթե ՀՀ ԱԺ-ն չլսի քաղաքացիների ձայնը և դեմ գնա նրանց կարծիքին, ապա բողոքի ակցիաներ են լինելու բոլոր քաղաքներում»,-ասաց նա:
Նշենք, որ բողոքի ակցիան մեկնարկել էր ԱԺ– բակում, այնուհետև վերածվել երթի։
Հիշեցնենք` Ստամբուլյան կոնվենցիա պայմանական անունը ստացած «Կանանց նկատմամբ բռնության ու ընտանեկան բռնության կանխարգելման» կոնվենցիան թեժ քննարկումներ ու բանավեճեր է առաջացրել Հայաստանում։
Ընդդիմախոսները պնդում են, որ փաստաթղթի վավերացումը կանաչ լույս կվառի միասեռական` ընտանիք կազմելու իրավունքի առաջ։ Կողմնակիցները վստահեցնում են, որ փաստաթղթում նման վտանգ թաքնված չէ։
ԱԺ-ն այս տարի չի քննարկի Ստամբուլյան կոնվենցիայի հարցը․ նախարար
Ստամբուլյան կոնվենցիայի վերաբերյալ վերապահումներ է հայտնել նաև Հայ առաքելական եկեղեցին։ Հոգևոր առաջնորդները հուլիսի 26-ին կոչ էին արել չընդունել Ստամբուլյան կոնվենցիան։
Նշենք, որ Ստամբուլյան կոնվենցիան վավերացրել են Եվրոպայի Խորհրդի անդամ 33 երկրներ։
Ռուսաստանի Դաշնությունն ու Ադրբեջանը հրաժարվել են ընդունել այն։
