ԵՐԵՎԱՆ, 1 նոյեմբերի – Sputnik. Սիրիահայերը ինտեգրվել են, բայց չեն ձուլվել հասարակությանը։ Այս մասին SANA գործակալության փոխանցմամբ, Սիրիայի նախագահ Բաշար Ալ–Ասադն ասել է արաբական լրատվամիջոցների հետ զրույցում։
Ասադի խոսքով` հայերը վերջինն են միացել սիրիական հասարակությանն ու միշտ հայրենասիրությամբ ու նվիրվածությամբ են առանձնացել։
«Նրանց հայրենասիրությունն ապացուցվել է պատերազմի տարիներին, ու բոլոր կասկածներն այդ հարցի շուրջ ցրվել են։ Միաժամանակ Սիրիայի հայերն ունեն իրենց կազմակերպությունները, եկեղեցիները և, որ ամենակարևորն է`դպրոցները։ Եթե որևէ հայկական արարողության ես մասնակցում` հարսանիք և այլն, իսկ ես գնացել եմ, քանի որ հայ ընկերներ ունեի, նրանք այնտեղ իրենց ավանդական երգերն են երգում, հետո ազգային երգեր են երգում», – պատմել է Ասադը։
Ի տարբերություն այլ համայնքների, հայերը քիչ են ձուլվել սիրիական հասարակությանը։
Ասադը կարծում է, որ ելնելով այս ամենից, սիրիական իշխանությունը պետք է հայերի հետ այլկերպ վարվի, քրդերի հետ`այլ։ Իսկ պատճառը, նրա խոսքով, վերջինների անջատողական տրամադրություններ են։ Նույնիսկ կան աշխարհագրական քարտեզներ, որոնք ներկայացում են Սիրիական Քրդստանը որպես մեծ Քրդստանի մի մաս։
«Իմ սիրտը հայի է». օտար կանայք, որոնք հայ որբերին մայրեր դարձան. մաս 1–ին
«Մենք մեր տարածքային ամբողջականությունը պահպանելու իրավունք ունենք ու իրավունք ունենք զգուշանալու անջատողական դատողություններից։ Մենք խնդիր չունենք այսպես կոչված «քրդական բազմազանության» հետ։ Հակառակը` այն հարուստ ու գեղեցիկ է։ Սակայն հարստություն ու բազմազանությունը մի բան է, իսկ բաժանումն ու երկրի պառակտումը` լրիվ այլ։ Հենց դա է խնդիրը», – նշել է Ասադը։
Սփյուռքի խնդիրների լուծումը հաճախ հենց Հայաստանում է. Զարեհ Սինանյան
Սիրիայի հայ համայնքը համարվում էր աշխարհի ամենահզոր համայնքներից մեկը և շուրջ 110 հազար մարդ էր ընդգրկում իր կազմում։ Սիրիական ճգնաժամից հետո, տարբեր գնահատականների համաձայն, ավելի քան 90 հազար հայ լքել է Սիրիան։ Սիրիայի Հալեպ քաղաքում շուրջ 60 հազար հայ էր բնակվում:
