ԵՐԵՎԱՆ, 30 հոկտեմբերի — Sputnik. Հայաստանը խորապես շնորհակալ է ԱՄՆ ներկայացուցիչների պալատի անդամներին՝ թիվ 296 բանաձևի օգտին վճռական և տպավորիչ քվեի համար։ Այս մասին նշված է ՀՀ արտաքին գործերի նախարարության տարածած հաղորդագրության մեջ, որը հրապարակվել է գերատեսչության կայքում։
«Հայաստանը ողջունում է ԱՄՆ ներկայացուցիչների պալատի կողմից թիվ 296 բանաձևի ընդունումը, որով հաստատվում է ԱՄՆ դիրքորոշումը Հայոց ցեղասպանության վերաբերյալ։ Այս բանաձևը կարևորագույն նշանակություն ունի»,–նշված է հաղորդագրության մեջ։
Բանաձևը, ըստ ԱԳՆ–ի, հաստատակամ է պաշտոնական ճանաչման և հիշատակման միջոցով ոգեկոչելու Հայոց ցեղասպանությունը, մերժելու ժխտողականությունը և խրախուսելու Օսմանյան կայսրության կողմից 1915-1923թթ․ 1․5 միլիոն հայերի բնաջնջման վերաբերյալ կրթության և իրազեկվածության բարձրացումը։
Այն ժամանակ Միացյալ Նահանգների ժողովուրդն ու ղեկավարությունը մեծ ջանքեր գործադրեցին հայերի նկատմամբ իրականացված վայրագություններին արձագանքելու գործում՝ փրկելով և օգնության ձեռք մեկնելով Հայոց ցեղասպանությունը վերապրածներին։
«Այս բանաձևը կարևոր ներդրում է միջազգային հանրության կողմից գործադրվող ջանքերին՝ ուղղված աշխարհի տարբեր անկյուններում նոր ցեղասպանությունների և զանգվածային վայրագությունների կանխարգելմանը։ Այսօր մենք նաև մեր խորին երախտագիտությունն ենք հայտնում աշխարհի մյուս բոլոր պետություններին՝ Հայոց ցեղասպանության ճանաչման գործում նախկինում գործադրած ջանքերի համար»,–նշված է ԱԳՆ–ի հայտարարության մեջ։
ԱՄՆ–ի ընդունած բանաձևում արդարությունը և ճշմարտությունը համախմբվել են. Մնացականյան
Գերատեսչությունը հայտնում է նաև, որ Հայաստանը խորապես հանձնառու է՝ շարունակելու սերտ համագործակցությունն իր բոլոր միջազգային գործընկերների հետ։
Հիշեցնենք, որ ԱՄՆ Կոնգրեսի ներկայացուցիչների պալատում քվեարկությունը կայացել է հոկտեմբերի 29-ին։ 405 կողմ, 11 դեմ, 3 ձեռնպահ քվեարկությամբ ԱՄՆ ներկայացուցիչների պալատը Հայոց ցեղասպանությունը ճանաչող բանաձև է ընդունել:
Պատմություն կերտեցինք. Քարդաշյանը` ԱՄՆ ներկայացուցիչների պալատի ընդունած բանաձևի մասին
