ԵՐԵՎԱՆ, 30 հոկտեմբերի - Sputnik. Այսօր՝ հոկտեմբերի 30-ին, խոշոր ավտովթար է տեղի ունեցել Արմավիրի մարզում։ Ժամը 20։40-ի սահմաններում Արմավիր-Գյումրի ավտոճանապարհի՝ Խանջյան գյուղի վարչական տարածքում բախվել են Opel մակնիշի 34 ՍN 028 համարանիշի ավտոմեքենան և խոտի հակով բարձված տրակտորը։ Այս մասին հայտնում է shamshyan.com-ը։
Վթարի հետևանքով տրակտորիստը, Opel-ի վարորդն ու 2 ուղևորները, տեղափոխվել են «Արմավիր» բժշկական կենտրոն։ Տուժածներից 2-ի վիճակը գնահատվել է ծայրահեղ ծանր, 2-ինը՝ միջին ծանրության։
Ինչպես նշել են դեպքի վայրում հավաքվածները վարորդներից 2-ին հիվանդանոց են տեղափոխել Արմավիրի հիվանդանոցի բժիշկները, իսկ 2-ին՝ քաղաքացիները։
Հավաքվածները նշել են նաև, որ վիրավորներին, մինչև բժիշկների ժամանումը, տեղում օգնություն են ցուցաբերել քաղաքացիները, այդ թվում՝ արտակարգ իրավիճակների նախարարության փրկարար ծառայության մի հրշեջ-փրկարար։
Մասիս քաղաքում երիտասարդներ են դանակահարվել
Ըստ աղբյուրի՝ Opel-ը մխրճվել է տրակտորի կցորդիչի մեջ, ինչի հետևանքով էլ տրակտորը կողաշրջվել է։
Փաստի առթիվ նյութեր են նախապատրաստվում։ Ոստիկանությունը պարզում է վարորդների և վիրավորների ինքնությունը։
