ԵՐԵՎԱՆ, 29 հոկտեմբերի – Sputnik. Սիրիայի հարցը քննարկվել է ՌԴ նախագահ Վլադիմիր Պուտինի հետ և Սիրիայի հյուսիսում բնակվող հայերի շահերն արդյունքում հաշվի են առնվել։ Այս մասին ՀՀ վարչապետ Նիկոլ Փաշինյանն ասել է Коммерсантъ-ի հատուկ թղթակից Վլադիմիր Սոլովյովին տված հարցազրույցում։
«Իմ խնդրանքն էր Ռուսաստանի նախագահին՝ անել ամեն ինչ, որպեսզի հաշվի առնվեն հայերի շահերն այդ քաղաքում: Այն ժամանակ լարվածությունն այնտեղ մեծ էր՝ Թուրքիայի ներխուժման պատճառով։ Ռուսաստանի նախագահը խոստացել է և պահել է խոստումը: Մենք տեսնում ենք, որ այդ զրույցը որոշակի դրական հետևանքներ է ունեցել», - ասել է Փաշինյանը՝ երախտագիտություն հայտնելով Վլադիմիր Պուտինին:
Փաշինյանը հույս է հայտնել, որ Սոչիում ձեռք բերված ռուս-թուրքական պայմանավորվածությունները կիրագործվեն, քանի որ Ռուսաստանը հայերի անվտանգությունն ապահովելու շատ լծակներ ունի:
Օտար նախագիծ․ ի՞նչ է իրենից ներկայացնում Սիրիայի «Հայկական գումարտակը»
Հիշեցնենք` ՀՀ վարչապետ Նիկոլ Փաշինյանը հոկտեմբերի 24-ին Facebook-ի իր էջում գրել էր, որ ըստ ռուս–թուրքական համաձայնագրի` Ռուսաստանի ռազմական ոստիկանության և Սիրիայի սահմանային ծառայության ստորաբաժանումները կտեղակայվեն թուրք- սիրիական սահմանի սիրիական հատվածում՝ Թուրքիայի հռչակած անվտանգության գոտուց դուրս: Քրդերը ստացել են լրացուցիչ 150 ժամ` Սիրիայի սահմանամերձ շրջանները լքելու համար։
Գրիգորյան․ «Նուբար Օզանյան» հայկական գումարտակն իրականում քրդական նախագիծ է
Հոկտեմբերի 12-ին Փաշինյանը հայտնել էր, որ հեռախոսով զրուցել է ՌԴ նախագահ Վլադիմիր Պուտինի հետ և խնդրանքով դիմել նրան, ինչը կարևոր է Սիրիայի հայ համայնքի անվտանգության համար:
