ԵՐԵՎԱՆ, 28 հոկտեմբերի - Sputnik. «Մուլտի Գրուպ» կոնցեռնի տնօրեն Սեդրակ Առուստամյանը կմնա ազատության մեջ։ Այս մասին լրագրողների հետ զրույցում ասաց ինքը` Առուստամյանը` հայտնելով ՀՀ քրեական վերաքննիչ դատարանի որոշման մասին։
«Դատարանը մերժեց ինձ գրավով ազատ արձակելու` Երևանի ընդհանուր իրավասության դատարանի որոշման դեմ դատախազության բողոքը: Արդար որոշում էր»,–ասաց նա։
Հայտնել էինք, որ Երևանի ընդհանուր իրավասության դատարանն Առուստամյանին 20 մլն դրամ գրավի դիմաց ազատ էր արձակել կալանքից։
«Մուլտի Գրուպի» տնօրենը 20 մլն դրամ գրավի դիմաց ազատ է արձակվել
Հիշեցնենք, որ Առուստամյանի դեմ հարուցված քրեական գործը վերաբերում է «Հյուսիս-Հարավ» ճանապարհի շինարարության ընթացքում թույլ տրված չարաշահումներին։
Ըստ գործի` նա, հանդիսանալով «Սթոնս» ՍՊԸ 100 տոկոս բաժնեմասի սեփականատեր, ընկերության աշխատանքներն իր հետ համակարգող Սուրեն Ավագյանի և Գուրգեն Սարգսյանի հետ Հյուսիս-Հարավ ավտոճանապարհի Թալին-Լանջիկ և Լանջիկ-Գյումրի հատվածների շինարարական աշխատանքներն իրականացնող կապալառու «ՍԻՆՈՀԻԴՐՈ ՔՈՐՓՈՐԵՅՇՆ» ՍՊԸ հայաստանյան մասնաճյուղի տնօրեն Վեն Սիաոյի հետ կնքել է երկու կեղծ պայմանագիր, ծառայությունների մատուցման կեղծ հաշիվներ, որոնցով «ՍԻՆՈՀԻԴՐՈ ՔՈՐՓՈՐԵՅՇՆ»–ից դուրս են գրվել ապօրինի ֆինանսական միջոցներ։ Հետո դրանց ծագումը թաքցրել են տարբեր փոխանցումների ու կանխիկացումների միջոցով։
«Մուլտի գրուպի» տնօրենին նաև փողերի լվացման մեղադրանք է առաջադրվել
Արդյունքում «ՍԻՆՈՀԻԴՐՈ ՔՈՐՓՈՐԵՅՇՆ» ՍՊ ընկերության հայաստանյան մասնաճյուղի հետ կեղծ պայմանագրերի կնքումից հետո մինչև 04.04.2017թթ. կատարված 7 փոխանցումների միջոցով «Սթոնս» ՍՊԸ–ին է փոխանցվել 1 162 260 574 ՀՀ դրամ:
«Մուլտի Գրուպի» տնօրենին մեղադրանք է առաջադրվել առանձնապես խոշոր չափերով փողերի լվացման, ֆինանսական բուրգ ստեղծելու կամ ղեկավարելու, ինչպես նաև հարկային պարտավորություններից խուսափելու համար։
