ԵՐԵՎԱՆ, 28 հոկտեմբերի — Sputnik. Ադրբեջանը բանակցային գործընթացը խաթարելու նպատակով գործի է դրել «համաժողովային առուծախի» փորձը: Այս մասին նշված է ՀՀ արտաքին գործերի նախարարության տարածած հայտարարության մեջ, որը վերաբերում է Չմիավորման Շարժման պետությունների և կառավարությունների ղեկավարների 18-րդ գագաթնաժողովում ադրբեջանական կողմի հնչեցրած հայտարարություններին։
Հոկտեմբերի 25-26–ում Ադրբեջանում անցկացվող գագաթնաժողովում Ադրբեջանի նախագահ Իլհամ Ալիևը հայտարարել էր, որ Ղարաբաղյան հակամարտությունը պետք է լուծվի բացառապես Ադրբեջանի ինքնիշխանության և տարածքային ամբողջականության շրջանակներում:
«Դատապարտում ենք այն հանգամանքը, որ գագաթնաժողովը հյուրընկալող և Շարժման ներկայիս նախագահող Ադրբեջանը ևս մեկ անգամ նախընտրեց չարաշահել իր անդամակցությունը Շարժմանը»,– նշված է ԱԳՆ–ի հայտարարության մեջ։
ԱԳՆ–ն հայտնում է նաև, որ ունենալով դիտորդ-պետության կարգավիճակ Չմիավորման Շարժման մեջ՝ Հայաստանը չէր կարող որևէ կերպ ներգրավվել կամ հավանություն հայտնել գործընթացին։ Սա բացահայտորեն ցուցադրում է հյուրընկալող պետության՝ հարթակը չարաշահելու մանիպուլյատիվ մտադրությունը։
ԱԳՆ–ի հայտարարության մեջ նշված է նաև, որ Հայաստանը ափսոսանք է հայտնում, որ Ամփոփիչ փաստաթղթի՝ Լեռնային Ղարաբաղի վերաբերյալ ձևակերպումները հակասում են Շարժման հիմքում ընկած սկզբունքներին։
«Նրանք ևս մեկ անգամ ցուցադրեցին իրենց մոտ հանձնառության բացակայությունը ԼՂ հակամարտության կարգավորման միջազգային մանդատ ունեցող ԵԱՀԿ Մինսկի խմբի համանախագահության ներքո ընթացող խաղաղ գործընթացին»,–նշված է ԱԳՆ հայտարարության մեջ։
Հայաստանը կոչ է անում Չմիավորման Շարժման անդամ պետություններին ցուցադրել պատասխանատվություն և հարգանք բանակցությունների նկատմամբ և գործել խաղաղ գործընթացի ոգուն, տրամաբանությանը և ուղուն համահունչ:
Ղարաբաղյան հակամարտությունը դեռևս անվտանգության սպառնալիքի աղբյուր է. ՀԱՊԿ գեներալ
Հիշեցնենք, որ Չմիավորման Շարժման պետությունների և կառավարությունների ղեկավարների 18-րդ գագաթնաժողովին մասնակցում են 158 երկրների ղեկավարներ, ինչպես նաև միջազգային կազմակերպությունների պատվիրակներ:
Մնացականյանը ղարաբաղյան հիմնախնդրի վերջին զարգացումներն է ներկայացրել արտգործնախարարներին
