ԵՐԵՎԱՆ, 25 հոկտեմբերի — Sputnik. ՌԴ արտգործնախարար Սերգեյ Լավրովը նոյեմբերին այցելելու է Հայաստան: Այս լուրը Sputnik Արմենիայի հետ զրույցում հաստատեց ՀՀ արտգործնախարարության մամուլի խոսնակ Աննա Նաղդալյանը։
«Այժմ այցի կազմակերպման շուրջ աշխատանքներ տարվում են: Հայ-ռուսական իրավապայմանագրային դաշտի ընդլայնման շուրջ աշխատանքները կրում են շարունակական բնույթ»,–ասաց Նաղդալյանը։
«Կոմերսանտ» թերթը, հղում անելով իր աղբյուրներին, հայտնել է, որ Լավրովի այցի ընթացքում ստորագրվելու է հուշագիր, որը ռուսաստանցի մասնագետներին թույլ է տալիս մուտք գործել Պենտագոնի փողերով Հայաստանում ստեղծված կենսալաբորատորիաներ:
Մեկ այլ աղբյուր թերթին հաստատել է, որ փաստաթղթի տեքստը պատրաստ է և միջգերատեսչական համաձայնեցման գործընթաց է անցնում: Կենսալաբորատորիաներ կկարողանան այցելել Ռուսաստանի առողջապահության և պաշտպանության նախարարությունների մասնագետները:
Պատասխանելով կոնկրետ կենսալաբորատորիաների հետ կապված փաստաթուղթ ստորագրելու մասին հարցին` Նաղդալյանն ասաց, որ նախքան փաստաթղթերի ստորագրումը դրանց բովանդակության վերաբերյալ որևէ մեկնաբանություն չի կարող անել:
Հայաստանի գիտական ինստիտուտները կֆինանսավորվեն ըստ արդյունավետության
ԱՄՆ փողերով արդիականացված լաբորատորիաները, որոնք իրականացնում են կենսաբանական հետազոտություններ, ուսումնասիրում են վիրուսներն ու շտամները, գործում են Ուկրաինայում, Վրաստանում, Հայաստանում և Ղազախստանում:
