ԵՐԵՎԱՆ, 22 հոկտեմբերի – Sputnik. ԱԻՆ ճգնաժամային կառավարման ազգային կենտրոնի պետ, գնդապետ Հովհաննես Խանգելդյանը աշխատանքից ազատման դիմում է գրել: Տեղեկությունը Sputnik Արմենիայի հետ զրույցում հաստատեց ինքը` Խանգելդյանը:
«Աշխատելու եմ մասնավոր սեկտորում, որտեղից հրավերը դեռ 1 տարի առաջ եմ ստացել։ 21 տարվա ստաժ ունեմ արդեն, ինչը թույլ է տալիս անցնել փրկարարական կենսաթոշակի, և ես դիմել եմ նախարարին` կենսաթոշակի անցնելու համար»,- ասաց Խանգելդյանը:
Անդրադառնալով այն հրապարակումներին, թե իր ազատման դիմումը պայմանավորված է իր և ԱԻ նախարար Ֆելիքս Ցոլակյանի միջև եղած տարաձայնություններով, Խանգելդյանն ասաց.
«Պարոն Ցոլակյանի հարթակը բավականին հեռու ու բարձր է նրա հետ տարաձայնություն ունենալու համար։ Նրա նշանակման առաջին իսկ օրվանից, ինչպես բոլոր նախարարների հետ, եղել են պետական պարկեշտության եւ թույլատրելի փոխհարաբերություններ՝ վերադասի եւ ստորադասի սկզբունքներով»,–ասաց Հովհաննես Խանգելդյանը։
Նա վստահեցրեց, որ իր ու նախարարի միջև խնդիրներ չեն եղել։ Իսկ եթե լինեին` դիմում չէր գրի ու չէր փախչի դրանցից։
ԱԻՆ–ի 7 աշխատակցի պայմանագրերը չեն երկարացվել. ինչ է իրականում կատարվում կառույցում
Հիշեցնենք` այսօր ԱԻՆ–ում սա պաշտոնից ազատվելու միակ դեպքը չէր. այսօր հայտնի դարձավ, որ ՀՀ վարչապետ Նիկոլ Փաշինյանի հրամանով Արտակ Նահապետյանն ազատվել է ԱԻՆ փրկարար ծառայության տնօրենի պաշտոնից։
Ավելի ուշ տեղեկություն տարածվեց, որ չեն երկարացվել պայմանագրերը ԱԻՆ–ի աշխատակիցներից 7–ի հետ:
