«Սաղսարան» հորինված նոր բառ է, այսինքն՝ ամենը սար է: Այսպես է առաջացել այդ կոնցեպտը, որի հեղինակը սփյուռքահայ երաժիշտ է, ով հիացած է հայրենի երկրի լեռներով ու սարերով: Նախագծի հետևում մի խումբ էնտուզիաստ, պրոֆեսիոնալ երաժիշտներ են:
««Սաղսարան» գաղափարական առումով համընկնում է այն ամենի հետ, ինչ անում ենք: Նախագծի նպատակն է շրջել գյուղից գյուղ, սարից սար, համայնքից համայնք, որտեղ ունենք խորհրդատուներ ու աջակիցներ, և տեղում հավաքել հետաքրքիր պատմություններ, պատկերներ՝ այդ ամենը դարձնելով երգ՝ որպես վերջնարդյունք», ասում է Անուշ Քոչարյանը:
Սկզբում նախագծի հեղինակներն անդրադարձել են Լոռու մարզի Լեռնապատ գյուղին, երկրորդը կլինի Շիրակի մարզի գյուղերից մեկը:
Նախապես ընտրված 12 համայնքին վերաբերվող յուրաքանչյուր նյութ դառնում է ֆիլմ, այսինքն՝ մշակվում է 12 երգ, ինչն ունենալու է տրամաբանական սեզոնի ավարտ` հետաքրքիր մի ուրիշ իրադարձությամբ, որն իր հերթին ամբողջացնելու է գրեթե մեկ տարվա աշխատանքի գաղափարը: Դա, իհարկե, լինելու է երաժշտական իրադարձություն:
