Լիանա Սարգսյանն առաջին հայ դիզայներն է, որն ընդգրկվել է FWO (Fashion Week Online)-ի ցուցակում և առանձին դեֆիլե-շոուով ներկայացրել իր հավաքածուն։ Երրորդ տարին անընդմեջ ElSi ապրանքանիշի հիմնադիրը մասնակցում է Միլանի նորաձևության շաբաթվան։
«Իմ բոլոր հավաքածուները ներկայացրել եմ նորաձևության ցուցադրությունների շրջանակում, ինչը հնարավորություն է տալիս ներգրավել ավելի շատ fashion buyer-ների, նորաձևության ոլորտի բլոգերների, հայտնի ամսագրերի լրագրողների, որոնք նորաձևության շաբաթին նախապես մասնակցելու համար հայտ են ներկայացնում»,- ասաց Լիանան։
Նա նշեց, որ այս տարին իրենց համար խորհրդանշական էր, քանի որ շոուին ներկա է գտնվել նորաձևության աշխարհում հայտնի Մարիո Բոզելլիին, որին նախապես հրավիրել էին:
«Մարիո Բոզելլիին նորաձևության աշխարհում շատ ազդեցիկ մարդ է, նաև Milan Fashion Week-ի հիմնադիրն է։ Միայն նրա ներկայությունն անչափ կարևոր է։ Նա նորաձևության աշխարհում կենդանի լեգենդ է»,-ասաց դիզայները։
Շքեղություն` հայկական ձևով. Հորդանանի թագուհին դիզայներ Գրիգոր Ջաբոտյանի զգեստն է կրում
Ցուցադրությանը մասնակցելու համար հավատարմագրվել են ավելի քան 2000 հայտնի բլոգերներ, լրագրողներ և fashion buyer-ներ։
Նախատեսված աթոռների քանակով պայմանավորված դիզայները ստիպված է եղել հավատարմագրվածների թիվը կրճատել։
Լիանայի համոզմամբ` Միլանի նորաձևության շաբաթն այս ոլորտում ստեղծագործող մարդկանց համար դեպի ճանաչելիություն տանող լավագույն ճանապարհն է, ինչի համար պետք է աշխատասիրություն, կրեատիվություն և ինքնատիպություն։
Լիանան նշեց, որ «Գարուն-Ամառ 2020» հավաքածուն ներկայացվել է լյուքս դասի չինական ներքնազգեստի Մերրիջ (Merrige) բրենդի հետ համատեղ և արժանացել է հյուրերի բարձր գնահատանքին։
Ցուցադրությունը սկսվել է բալետային համարով՝ խորեոգրաֆ և աշխարհահռչակ Լա Սկալա թատրոնի բալերինա Աննա Օլխովայայի կատարմամբ։
Լիանա Սարգսյանի և նախագծի կազմակերպիչ Տարիել Բիշարյանի նախաձեռնությամբ թե՛ պարային համարի, թե՛ ամբողջ ցուցադրության համար ընտրվել է Արամ Խաչատրյանի «Սպարտակ» բալետի երաժշտությունը, (այն վերամշակել է իտալացի հայտնի DJ La Fed֊ը):
Նշենք, որ Լիանա Սարգսյանը հայտնի անուն է Եվրոպայի նորաձևության շրջանակում։
Վենետիկի 74-րդ կինոփառատոնի կարմիր գորգին Էլսի զգեստները կրել են ամերիկյան դերասանուհի Թիֆանի Բրաուերը և Էլնա֊Մարգրեթը` Բենթհայմի և Շտայնֆուրթի արքայադուստրը։
