Հայաստանի քաղաքական գործիչները չեն ուզում իմանալ, որ քաղաքական PR մասնագետների և քաղտեխնոլոգների առկայությունը գոնե իրենց շրջապատում, գոնե նրանց խորհուրդների մասով շատ կարևոր է: Sputnik Արմենիայի հետ զրույցում այս մասին ասաց Էդգար Խաչատրյանը։
Նրա խոսքով` կան բառեր, հագուստի տեսակներ, ժեստեր, որոնց գոյության մասին մարդը կարող է չիմանալ, ուստի նրան ինչ-որ մեկը պետք է ուղղորդի: Եթե մարդը մեկի հետ հինգ տարի աշխատի, կարող է PR տեխնոլոգի կարիք չունենալ, բայց մեր քաղաքական ներկա գործիչներից շատերի պարագայում դա անհրաժեշտություն է:
«ԱԺ-ում ելույթներ ես լսում, որոնք բերում են շատ զավեշտալի իրավիճակների: Ինչո՞ւ է այդպես, որովհետև այդ մարդիկ մասնագիտական խորհուրդներ չեն լսում և շարժվում են իրենց տեսակետով: Չեն ուզում լսել, օրինակ, ինչպես կարելի է շփվել լրագրողների հետ, ինչ բառեր ու ժեստեր օգտագործել, որպեսզի չհայտնվեն զավեշտալի իրավիճակներում»,- նշում է Խաչատրյանը:
Քաղաքական PR մասնագետի կարծիքով՝ ի վերջո քաղաքականությունը կանխատեսելի է, քաղաքական հարցերը` նույնպես, ու եթե մարդը պատրաստված է, ապա միանշանակ գիտի, թե ինչպես պատասխանի հարցերին:
«Մենք այդ ամենը չունենք, հետևաբար հանդիպում ենք տարբեր իրավիճակների, երբ մարդիկ քննարկում են նախևառաջ այս կամ այն գործչի հագուկապը, արտասանած խոսքը»,– ասում է նա:
Խաչատրյանը նշում է նաև, որ որոշ կուսակցություններում կան այդպիսի մասնագետներ, որոնց հետ հստակ խորհրդակցում են: Նման մասնագետներին դիմում են հիմնականում ընդդիմության ներկայացուցիչները, որոնք գնում են իմիջային փոփոխությունների:
Սուրենյանց․ «Առաջիկայում ուրվագծվելու է այն ուժը, որը հավակնելու է նոր ընդդիմության դերին»
