ԵՐԵՎԱՆ, 15 հոկտեմբերի - Sputnik. «Հայելի» ակումբի մասնագիտական օրինական գործունեությանը խոչընդոտելու համար մեղադրանք է առաջադրվել 4 երիտասարդի: Նրանց նկատմամբ որպես խափանման միջոց է ընտրվել ստորագրություն չհեռանալու մասին: Այս մասին հայտնում է Քննչական կոմիտեն։
2019թ. հոկտեմբերի 5-ին համացանցում տեսանյութ էր տարածվել, որում երևում էր, որ մի խումբ անձինք` Դավիթ Հովհաննիսյանը, Սարգիս Մանուկյանը, Արտակ Մարգարյանն ու Հայկ Ստեփանյանը ձվերով հարվածել են «Հայելի» ակումբի պատին, փակցրել պաստառներ և հայտնել, որ չեն թույլատրելու լրատվական կայքի աշխատանքը՝ «hayeli.am» լրատվական կայքում հրապարակված «Ալիևի ուշացած, բայց ուժգին պատասխանը Փաշինյանին՝ Պուտինի մոտից» վերտառությամբ հոդվածի հետ կապված:
Դեպքի առթիվ հարուցվել էր քրեական գործ՝ ՀՀ քրեական օրենսգրքի 164-րդ հոդվածի 1-ին մասով (լրագրողի մասնագիտական օրինական գործունեությանը խոչընդոտելը կամ նրան տեղեկություններ տարածելուն կամ տարածելուց հրաժարվելուն հարկադրելը):
Այս արարքի համար քրեական օրենսգիրքը նախատեսում է տուգանք` նվազագույն աշխատավարձի երկուհարյուրապատիկից չորսհարյուրապատիկի չափով։
Քրեական գործով 4 երիտասարդները նախապես ներգրավվել էին որպես կասկածյալ։
«Հայելի» ակումբի վրա ձվեր են նետել
«Հայելի» ակումբի ղեկավարն Անժելա Թոմվասյանն է` ՍԴ նախագահ Հրայր Թովմասյանի քույրը։
Կատարվածին արձագանքել է ՀՀ ՄԻՊ Արման Թաթոյանը՝ նշելով, որ լրագրողի կամ լրատվամիջոցի նկատմամբ ոտնձգությունը մասնագիտական գործունեության կապակցությամբ վտանգում է խոսքի ազատությունն ու այլակարծությունը: Կատարվածը դատապարտել էր նաև Հայաստանի ժուռնալիստների միությունը՝ այն որակելով որպես ոտնձգություն ազատ խոսքի դեմ։
