ԵՐԵՎԱՆ, 14 հոկտեմբերի – Sputnik. Կոնյակի կամ բրենդիի անվան տակ մգեցված սպիրտ վաճառողներն օրենք չեն խախտում։ Այսօր կայացած ասուլիսում նման տեսակետ հայտնեց ՀՀ էկոնոմիկայի նախարար Տիգրան Խաչատրյանը։
«Իրականում դա այնպիսի սպիրտ է, որը Հայաստան է ներկրվում առանց օրենքի խախտման։ Այն խաղողի սպիրտի հետ կարող է օգտագործվել կոնյակի արտադրության համար։ Եվ ստանդարտներն են թույլ տալիս, որ որոշ չափով լինեն այդպիսի դեպքեր` օրենքով սահմանված թույլատրելի չափը չգերազանցող»,–ասաց Խաչատրյանը։
Նախարարի համոզմամբ, սակայն, քանի դեռ այդ երևույթը կա, տեղական խաղողի արտադրությունը չի կարող ընդլայնվել, որովհետև պահանջարկը բարարվում է ներմուծվող սպիրտի հաշվին։
«Այո, մենք կարող ենք սահմանափակումներ կիրառել, որ հասնենք այդ ներմուծման երևույթն իսպառ վերացնելուն։ Կարծում եմ` նաև կառավարության քաղաքականությունը պետք է ուղղված լինի հայկական կոնյակը հայկական խաղողից արտադրելուն»,– ասաց նախարարը։
Այդուհանդերձ, հարցը, նախարարի խոսքով, մեկ օրում լուծվել չի կարող` հաշվի առնելով արտադրողների ու ոլորտի աշխատողների շահերը։
Փաշինյանը վիետնամցի գործարարներին առաջարկել է հայկական գինի ու կոնյակ արտահանել Վիետնամ
Ինչ վերաբերում է խաղողի արտադրությանն ու գյուղացիների դժգոհություններին, Տիգրան Խաչատրյանը հայտնեց, որ մթերող կազմակերպությունների տվյալներով` այս տարի, մինչև հոկտեմբերի 11-ը ներառյալ, շուրջ 160 000 տոննա խաղող է մթերվել։ Իսկ առկա դժգոհությունը վերաբերում է 80-100 տոննա խաղողին։
«Ընդ որում, այդ 160 հազար տոննայի դեպքում կողմերը համաձայնել են տվյալ տարվա պայմանների հետ: Մյուս կողմում կան դժգոհներ, որոնք կարծում են, որ իրենց խաղողը կարող էր վաճառվել ավելի բարձր գնով»,– ասաց նախարարը` հավելելով, որ ինչ-որ պահի կողմերը փոխզիջման են եկել, բայց հետո նորից դժգոհություն է առաջացել։
Տիգրան խաչատրյանը նշեց, որ ստեղծված իրավիճակում կառավարությունը կողմերին որեւէ բան պարտադրել չի կարող, կարող է միայն օժանդակել փոխհամաձայնության գալուն:
