ԵՐԵՎԱՆ, 14 հոկտեմբերի – Sputnik. Պնդումները, թե փակվում են տարածաշրջանի բոլոր մաքսատները, և ավտոմեքենաների մաքսազերծումն իրականացվելու է բացառապես Հյուսիսային մաքսատուն-վարչությունում, չի համապատասխանում իրականությանը: Այսօր լրագրողների հետ զրույցում այս մասին ասաց մաքսային ծառայության գնդապետ, ՊԵԿ նախագահի տեղակալ Շուշանիկ Ներսիսյանը:
«Այդ տեղեկությունը թերի է, որովհետև խոսքը վերաբերում է միայն այն մեքենաներին, որոնք ոչ կոնտեյներներով են ներմուծվում Վրաստանից և Ճապոնիայից: Նաև տեղեկություն էր տարածվել, որ Դուբայից ներմուծված մեքենաները ևս պետք է այստեղ մաքսազերծվեն, չկա նման բան, միայն ասել ենք` եթե Դուբայից կլինեն մեքենաներ, որոնք սահմանը կհատեն Վրաստանով, ապա հնարավորություն կլինի մաքսազերծում կատարել Սիսիանում, ոչ թե գալ, հասնել Հյուսիսային մաքսատուն-վարչություն»,- պարզաբանեց Ներսիսյանը:
Այն մեքենաները, որոնք սահմանը հատել են հայ-իրանական հատվածում, մաքսային ձևակերպումներն իրականացնում են Սիսիանում գտնվող Հարավային մաքսատուն-վարչությունում:
«Ինչպես հայտարարել էինք, առավոտյան 9:00-ից պատրաստ սպասել ենք քաղաքացիներին, 15:00-ի դրությամբ արդեն մոտ 100 մեքենա ենք սպասարկել: Հոսքը մեր սպասածից մի փոքր քիչ է, մենք ավելիին ենք պատրաստ: Այսօր Հյուսիսային մաքսատուն-վարչությունում աշխատում ենք Նորագավթի մաքսատան հնարավորություններով, այսինքն` եթե այնտեղ օրական մոտ 600 մեքենա է ձևակերպվում, Հյուսիսային մաքսատուն-վարչությունում պատրաստ ենք առանց հերթի 300-400 մեքենա ձևակերպել»,- ավելացրեց Ներսիսյանը։
Լավ լուր ներկրողների համար. հունվարին հնարավոր կլինի մեքենա ներկրել գործող դրույքաչափով
Ի դեպ, քաղաքացիներն էլ են նկատել, որ Գյումրիում ձևակերպումները շատ արագ են կատարվում։
«Երկրորդ ավտոն եմ այստեղ մաքսազերծում: Առաջինն արդեն արել վերջացրել եմ: Ամեն ինչ նորմալ է ու շատ արագ: Մեկ ամիս առաջ Արարատյան մաքսատուն-վարչությունում մեքենա եմ ձևակերպել ու տեսել եմ հերթը՝ «ռաժոկով» էին ավտոները մտցնում ու հանում, իսկ այսօր զարմացա. ոչ մի հերթ, իսկ այնտեղ 3 օր եմ հերթ կանգնել»,- պատմեց քաղաքացիներից մեկը` Խաչատուր Մելիքյանը:
Հիշեցնենք, որ Գյումրիում կառուցվող Արտաքին տնտեսական գործունեության սպասարկման կենտրոնի շինարարությունն ավարտելուն զուգահեռ այստեղ կտեղափոխվեն տրանսպորտային միջոցների մաքսային ձևակերպումների հետ կապված բոլոր գործառույթներն ամբողջությամբ; Հարավային սահմանով մտած տրանսպորտային միջոցների համար Սիսիանի մաքսատունը կշարունակի գործել:
Կառավարությունը նվազեցնում է արտերկրից ներկրվող ավտոմեքենաների մաքսազերծման գները
