ԵՐԵՎԱՆ, 13 հոկտեմբերի –Sputnik. Իվետա Մուկուչյանի «Իմ անուշ Հայաստան» երգի տեսահոլովակն արդեն հասանելի է համացանցում: Sputnik Արմենիան զրուցել է սիրված երգչուհու հետ` հասկանալու համար, թե նոր տեսահոլովակն ինչով է տարբերվում նախորդներից:
«Այս տեսահոլովակում փորձել ենք ներկայացնել մեր ավանդույթները և տոները ժամանակակից շնչով: Տեսահոլովակում կան բուրդ չփխելու, խաղող ճզմելու, բախտախաղի տեսարաններ, տոներից անդրադարձել ենք Վարդավառին, Ջանգյուլումին, Տյառնընդառաջին»,-ասաց երգչուհին։
Նա հույս ունի, որ տեսահոլովակը կսիրվի հանդիսատեսի կողմից այնպես, ինչպես իր նախորդ երկու տեսահոլովակները Հայաստանի մասին՝ «Հայաստան ջանը» և «Հայաստանի աղջիկները»:
Իվետան հպարտությամբ է նշում, որ մինչև օրս իրեն ուղարկում են տարբեր պարային բեմադրություններ, որոնք ստեղծվել են իր վերոհիշյալ երգերի ներքո թե՛ Հայաստանում, թե՛ սփյուռքում:
Հայաստանից լավ տեղ չկա. Իվետա Մուկուչյանի անկեղծ խոստովանությունը
Իվետան շեշտում է, որ կարող է հանդես գալ ինչպես եվրոպական, այնպես էլ հայկական կերպարներով:
«Ես միշտ կատակով նշում եմ, որ կա երկու Իվետա՝ մեկն ավելի եվրոպական, քանի որ նորություն չէ, որ ես Գերմանիայում եմ մեծացել, մյուսն՝ ավելի հայկական: Այսօր նոր, ռիթմիկ երգերի պահանջ կա. երգերի, որոնք իրենց մեջ ժամանակի շունչն են պարունակում»,-եզրափակեց Իվետան:
«Ես այլևս բաց գիրք չեմ». ինչպես ամենասեքսուալ Իվետա Մուկուչյանը որոշեց գրավել աշխարհը
Նշենք, որ Իվետա Մուկուչյանի «Իմ անուշ Հայաստան» երգի տեսահոլովակի ռեժիսորը Արթուր Մանուկյանն է, օպերատորը՝ Արտյոմ Աբովյանը։ Տեսահոլովակը նկարահանվել է Գրիգոր Կյոկչյանի և Lazzaro-ի «Իմ անուշ Հայաստան» երգի հիման վրա:
