ԵՐԵՎԱՆ, 11 հոկտեմբերի - Sputnik. Աշխատանքային այցով Թուրքմենստանում գտնվող վարչապետ Նիկոլ Փաշինյանը հոկտեմբերի 11-ին հանդիպում է ունեցել Ուզբեկստանի Հանրապետության նախագահ Շավքաթ Միրզիյոևի հետ։
Ինչպես հայտնում են ՀՀ վարչապետի մամուլի ծառայությունից, երկու երկրների ղեկավարները քննարկել են հարաբերությունների սերտացման ու բարեկամ ժողովուրդների միջև կապերի ամրապնդման հեռանկարները։
«Մեզ մեկ հաղթանակ է պետք». Հայաստանից մինչև Ուզբեկստան երգում են Օկուջավայի երգը
Վարչապետ Փաշինյանը հայտնել է հայկական կողմի պատրաստակամությունը` նպաստելու երկկողմ հարաբերությունների նոր օրակարգի ձևավորմանն և դրա արագ ու արդյունավետ իրագործմանը։
Շավքաթ Միրզիյոևը, ողջունելով Նիկոլ Փաշինյանին, ընդգծել է, որ Ուզբեկստանը ևս կարևորում է մեր երկրի հետ կապերի զարգացումը`համագործակցությանը նոր շունչ և որակ տալու նպատակով։ Այս համատեքստում Ուզբեկստանի նախագահն առաջարկել է քննարկել միջկառավարական հանձնաժողովի ձևավորման հնարավորությունը։
Փաշինյանը վստահություն է հայտնել, որ հանձնաժողովն առաջիկայում կձևավորվի և արագ ու արդյունավետ գործունեության արդյունքում կմշակի համապատասխան իրավապայմանագրային դաշտ։
Հայաստանի վարչապետն իր գոհունակությունն է հայտնել Ուզբեկստանում հայ համայնքի նկատմամբ Ուզբեկստանի կառավարության հոգատար վերաբերմունքի, տեղացի հայերի նկատմամբ ուզբեկ ժողովրդի տածած հարգանքի և բարեկամական վերաբերմունքի համար։
