ԵՐԵՎԱՆ, 10 հոկտեմբերի – Sputnik. Քաղաքական խոսքում բռնության, դրա սպառնալիքի, անգամ բռնության հնարավորության մասին հիշատակումը նույնքան բացարձակ մերժելի է, որքան ցանկացած այլ ոլորտում։ Այս մասին Facebook-ի իր էջում գրել է ՀՀ մարդու իրավունքների պաշտպան Արման Թաթոյանը։
«Բռնությունը կամ բռնության սպառնալիքն անթույլատրելի է սկզբունքորեն՝ անկախ նրանից երբ և ում կողմից է արվում կամ ում է ուղղված։ Դրանք վտանգում են մարդու իրավունքների համակարգը երկրում և խաթարում համերաշխությունը հասարակությունում»,- նշել է նա։
«Տարիներով թալանել են մարդկանց». ՄԻՊ–ն առաջարկում է վերանայել ունեցվածքն օտարելու օրենքը
ՀՀ ՄԻՊ-ը մտահոգություն է հայտնել, որ մեր երկրում վիրավորանքն ու ատելությունը վտանգավոր չափերի են հասել։
Նա բոլորին կոչ է արել սեփական օրինակով նպաստել համերաշխության մթնոլորտի ձևավորմանը, իսկ հանրային, այդ թվում՝ քաղաքական, ու հասարակական գործիչներին` զերծ մնալ հրապարակային խոսքում ցանկացած ձևակերպումից, որը կարող է ընկալվել որպես բռնություն, բռնության սպառնալիք կամ անգամ բռնության հավանականություն և առաջացնել լարվածություն։
Ավելի վաղ Թաթոյանը լրագրողներին տված հարցազրույցում նշել էր, որ երկրում անհանդուրժողականության մակարդակը բավականին բարձր է, դա հատկապես արտահայտվում է սոցիալական ցանցերում: Համացանցում է, որ մարդիկ ցույց են տալիս ագրեսիայի ամենամեծ աստիճանը:
