ԵՐԵՎԱՆ, 8 հոկտեմբերի — Sputnik. Reddit կայքի և Initialized Capital վենչուրային ընկերության համահիմնադիր Ալեքսիս Օհանյանին հիանալի անակնկալ մատուցեցին Երևանում նրա «Առանց թույլտվության» գրքի շնորհանդեսի ժամանակ։
Շնորհանդեսը սկսվեց աշխարհահռչակ երգչուհի Գվեն Ստեֆանիի Hollaback girl երգով, որի մասին նա հիշատակում է գրքում։ Զարմացած Օհանյանը չկարողացավ թաքցնել հիացմունքը։
Նա խոստովանեց, որ ոչ մի շնորհանդես այդքան կարևոր ու գեղեցիկ չի եղել իր համար, որքան այս մեկը` մայրենի լեզվով (ի դեպ, նա հայերեն չի խոսում, բայց խոստանում է սովորել)։ Նա հավաստիացրեց, որ այս օրերին Հայաստանին ու հայերին հասցեագրված բոլոր ջերմ խոսքերը սրտից են բխում։
«Ասես ԱՄՆ–ում Հայաստանի դեսպանը լինեմ, հատկապես, եթե հաշվի առնենք, որ ծնվել եմ ապրիլի 24–ին։ Ես հպարտանում եմ իմ ժողովրդով, որը շարունակում է զարգանալ ու բարգավաճել` ի հեճուկս բազմաթիվ ճնշումների։ Վերջապես մենք կարող ենք լիովին իրագործել մեր ժողովրդի ներուժը», – ասաց նա։
Ալեքսիսը պատմեց, որ մեծ ուշադրությամբ է հետևում Հայաստանում ընթացող քաղաքական գործընթացներին և «թավշյա հեղափոխությունը» համարում է խաղաղ ու շատ արդյունավետ։ Նրա խոսքով` այն աշխարհում ոգեշնչում է շատերին և կարող է դրական օրինակ ծառայել։
«Իզուր չէ, որ այդ հեղափոխությունը հայերն են իրագործել, և հենց հայերն են եղել դրա հեղինակները», – կատակեց նա։
Հիշելով 2010թ–ին Հայաստան կատարած իր առաջին այցը` նա խոստովանեց, որ հիմա ավելի շատ հույս է տեսնում մարդկանց աչքերում։
Օհանյանը խոստացավ վերադառնալ կնոջ հետ. երեխային մկրտելու հարցը դեռ կքննարկեն
«Ես չափազանց հուզված եմ ձեր ջերմ ընդունելությունից։ Իհարկե, հասկանում եմ, որ դուք բոլորդ սպասում եք կնոջս ու աղջկաս։ Շուտով, շատ շուտով նրանք էլ կգան», – հայտարարեց նա։
Շնորհանդեսի վերջում ներկայացվեց մի տեսահոլովակ, որում «անցյալի» Ալեքսիսը հիշեցնում է այսօրվա Ալեքսիսին, որ նա չի սիրել աշխատել, հիացած չի եղել ժամանակից գաղափարներով ու հատկապես ատել է թենիսը։ Այժմ նա խորհուրդ է տալիս ներկա Ալեքսիսին ժամանակ չծախսել «թունավոր» հարաբերությունների ու անհետաքրքիր բաների վրա, սիրել ընտանիքն ու աշխարհում ամենից շատ գնահատել այն։
Թանկյանը և Օհանյանը հայտարարել են «համահայկական թվային պլատֆորմ» ստեղծելու մասին
