WCIT 2019 համաժողովը կարևոր է ոչ միայն Հայաստանի, այլ նաև ամբողջ աշխարհի համար։ Այս մասին Sputnik Արմենիայի հետ զրույցում ասաց Կարեն Վարդանյանը։
«Կոնգրեսի ժամանակ քննարկվում են ապագային միտված հարցեր, այսինքն` թե ինչպիսին կլինի տեղեկատվական տեխնոլոգիաների ոլորտը 10-20 տարի հետո։ Մարդիկ հարստացնում են միմյանց` նոր տեխնոլոգիաների վերաբերյալ իրենց պատկերացումներով»,- ասաց նա։
Վարդանյանի խոսքով` Հայաստանն էլ պետք է հասկանալ տեղեկատվական տեխնոլոգիաների ոլորտի միտումները։
«Հայաստանը շատ հստակ դիրքավորվում է տեխնոլոգիական քարտեզում որպես տեխոլոգիական երկիր։ Շատ կարևոր է, որ ոլորտի առաջատարները համաժողովի ընթացքում շփվեն աշխարհի առաջատարների հետ, ինչը կարող է նաև բիզնես համագործակցության լուրջ հիմք լինել»,- նշեց Վարդանյանը։
Ինչ վերաբերում է Հայաստանում ՏՏ ոլորտի խնդիրներին, ապա Վարդանյանի կարծիքով, դրանցից ամենահիմնականը ոլորտի դիվերսիֆիկացիան է։
«ՏՏ ոլորտը պետք է սփռվի հավասարաչափ, քանի որ մենք պատերազմող երկիր ենք և ունենք նախևառաջ հենց ՏՏ ոլորտի անվտանգության խնդիր։ Երկրորդը կրթության հարցն է, առաջիկայում դպրոցներում «Արմաթ» լաբորատորիաներ ստեղծելով` կլուծվի ոլորտում կադրերի պատրաստման հարցը»,- ընդգծեց Վարդանյանը։
Նշենք, որ Երևանի Կարեն Դեմիրճյանի անվան մարզահամերգային համալիրում պաշտոնապես մեկնարկել է Տեղեկատվական տեխնոլոգիաների համաշխարհային կոնգրեսը։ Երևանյան համաժողովին մասնակցում են 70 երկրների ավելի քան 2500 առաջնորդներ, նորարարներ, քաղաքական գործիչներ, հետազոտողներ, արվեստի և շոու բիզնեսի աստղեր։ Հրավիրվածների թվում են Էրիկ Իսրայելյանը, Սերժ Թանկյանը, Ալեքսիս Օհանյանը։ Կոնգրեսը Հայաստանում անցկացվում է առաջին անգամ։ ՏՏ ոլորտի աշխարհի ամենահեղինակավոր համաժողովի կազմակերպման հերթափոխը Հայաստանին է փոխանցել Բրազիլիան։ 2020 թվականին միջազգային համաժողովը կանցկացվի Հնդկաստանում։
