Օպտիմալացման հետևանքով համայնքներ կան, որ այլևս գրադարան չունեն։ Այս մասին Sputnik Արմենիայի հետ զրույցում հայտնեց Կրթության, գիտության, մշակույթի և սպորտի նախարարության գրադարանային ոլորտի գլխավոր մասնագետ Նազիկ Հովասափյանը։
«Համայնքերում գրադարաններ են փակվում․ գիրք կա, ընթերցող կա, ֆինանսկան միջոցներ չկան։ Համայնքների հաստիքացուցակում գրադարանավարի հաստիք այլևս չկա»,-ասաց նա։
Հովասափյանը նշում է, որ ներկայում պետության հովանու տակ ընդամենը 10 գրադարան է գործում, մնացածները համայնքային են։
«Պետական գրադարաններում գրեթե բոլոր հարցերը լուծված են, անգամ նոր հրատարակված գրականությունն է շատ արագ հայտնվում գրադարակներում, մինչդեռ համայնքային գրադարանները փակվում են»,- նշեց մասնագետը։
Հովասափյանը կարծում է, որ համայնքների մշակութային ծրագրերում պետք է փոփոխություն կատարվի և գրադարանների առկայությունը պարտադրվի։ Գործող օրենքով, համայնքի ղեկավարն ինքն է որոշում՝ համայնքն ուենա գրադարան, թե ոչ։
Մասնագետը վստահ է`չպետք է հաշտվել այս իրավիճակի հետ, պետք է պայքարել, որպեսզի բոլոր համայնքներում անպայաման գրադարաններ գործեն։
Համայնքային գրադարանների փակման խնդրով նախարարությունը դիմել է կառավարությանը։
Նշենք, որ այս տարի Գրադարանավարի օրը նվիրվում է Հովհաննես Թումանյանի և Կոմիտասի 150-ամյա հոբելյաններին։ Բազմաթիվ միջոցառումներ են նախատեսված Երևանում և մարզերում։
Կառավարության որոշմամբ` 2004թ.-ից հոկտեմբերի 7-ը ՀՀ-ում նշվում է որպես Գրադարանավարի օր:
