ԵՐԵՎԱՆ, 3 սեպտեմբերի – Sputnik. «Իմ քայլը» խմբակցության պատգամավոր Անդրանիկ Քոչարյանը չի պատրաստվում ներողություն խնդրել ՀՀ արդարադատության նախկին նախարար Արփինե Հովհաննիսյանից։ Նա այս մասին ասաց այսօր Ազգային ժողովում` պատասխանելով լրագրողների հարցերին։
«Ներողություն չեմ պատրաստվում խնդրել, սպասում եմ Արփինե Հովհաննիսյանն իր հարցազրույցում արած հայտարարությունը որևէ կերպ մեկնաբանի, իսկ եթե Արփինե Հովհաննիսյանի ընտանիքի անդամները որևէ կերպ նեղացել են, եթե նեղացրել եմ նրա հայրիկին, ես պատրաստ եմ հանդիպել նրա հետ և քննարկել, թե այս խնդիրը որտեղ է առաջացել, ես պատրաստ եմ, որևէ խնդիր չկա»,– ասաց նա։
Նշենք, որ Անդրանիկ Քոչարյանը օրերս հարցազրույց էր տվել ԶԼՄ–ներից մեկին։ Լրագրողը հիշեցրել էր, որ Արփինե Հովհաննիսյանը վերջին հարցազրույցներից մեկում, խոսելով թալանված ակտիվների, ապօրինի գույքի վերադարձի մասին, պայմանականորեն տվել էր նաև Անդրանիկ Քոչարյանի ու Գագիկ Ջհանգիրյանի անունը։ Դրան ի պատասխան Քոչարյանն ասել էր. «Արփինե Հովհաննիսյանը, լինելով արդարադատության նախկին նախարար, փոխանակ իր հնարավորությունները կամ ռեսուրսները ներդնի իր՝ Հայաստանից փախած թիմակիցներին Հայաստան վերադարձնելու ուղղությամբ, զբաղված է անհեթեթ, չփաստարկված հայտարարություններ աջ ու ձախ տարածելով։ Արփինե Հովհաննիսյանը պետք է խոսի փաստերով, իսկ պայմանական կարող է տալ իր մայրիկի և անհայտ հայրիկի անունները»։
«Ես հարցին պատասխանել եմ՝ արձագանքելով դրան նախորդած հարցազրույցում Արփինե Հովհաննիսյանի կողմից իմ անունը հոլովելուն, իհարկե՝ նա ասաց որպես օրինակ կամ պայմանականորեն, ես էլ հակադարձել եմ, պայմանականորեն իմ անունը հոլովելու փոխարեն կարող էր այլ անուն հոլովել, ենթադրենք մայրիկի կամ ընտանիքի այլ անդամի, կամ իրենը եթե վերաբերում է նախկինում հայտարարագրված ունեցվածքին։ Իմ ունեցվածքի հայտարարագիրը դրված է կայքերում և եթե Արփինե Հովհաննիսյանը հանկարծ իր պաշտոնավարման տարիներին էլ կարող էր ամեն ինչին ծանոթ լինել, բայց ինքը հարցազրույցում քաղաքական իրողություններին տվել է սխալ գնահատականներ, նաև իմ անձի վերաբերյալ, որի պատասխանը ես տվել եմ այդպիսի ձևակերպմամբ»,– ասաց Քոչարյանը։
Նրա խոսքով` իր ասածից բոլորը վիրավորվել են, բացի Արփինե Հովհաննիսյանից։
«Սատանայի փաստաբան» Հրայր Թովմասյանը գնալու է Սերժ Սարգսյանի հետևից. Ալեն Սիմոնյան
Անդրանիկ Քոչարյանի ասածը բուռն քննարկումների թեմա է դարձել հատկապես սոցցանցերում։ Մի շարք պատգամավորներ դատապարտել են նրան։
Է՛լ դատախազի որդի, է՛լ քաղաքապետի կին, է՛լ մտերիմ. ովքեր են 12 տարի առաջ հողերի տիրացել
