ԵՐԵՎԱՆ, 3 հոկտեմբերի — Sputnik. Չինական արտադրության Xiaomi բջջային հեռախոսներ ներկրող գործարարը դիմել է Տնտեսական մրցակցության պաշտպանության պետական հանձնաժողով` բողոքելով բջջային հեռախոսների վաճառքով զբաղվող «Մոբայլ Սենթր» ընկերության վարած գնային քաղաքականության դեմ։
Այս մասին այսօր կառավարության նիստի ավարտին լրագրողների հետ ճեպազրույցում ասաց հանձնաժողովի նախագահ Գեղամ Գևորգյանը։
«Xiaomi–ն Հայաստանում փաստացի ավելի էժան է վաճառվում, քան այն գինը, որով տվյալ ընկերությունը ներկրում է»,– ասաց Գևորգյանը։
Ընդ, որում, թեև բողոքն ուղղված է եղել կոնկրետ ընկերության դեմ ու վերաբերել է կոնկրետ մեկ բրենդի, բայց շուկայի ուսումնասիրությունը ցույց է տվել, որ երևույթն առկա է ոլորտի բոլոր խոշոր ընկերություններում, այդ թվում` բջջային կապի 3 օպերատորների։
«Այսինքն` եթե դու վաճառում ես համ ինտերնետ, համ հեռախոս, համ լիցքավորման այլ բաներ, դու կարողանում ես մի աղբյուրից եկամուտ ստանալ, և քեզ համար դա բավական է։ Իսկ այն մարդը, որը վաճառում է միայն հեռախոս, չի կարող այդպիսի քաղաքականություն իրականացնել։ «Մոբայլ Սենթրը» բերում է 10 տեսակ ապրանք, վաճառում է դրանք, և եթե դրանցից 3-ի դեպքում էլ 0 դրամ շահույթով դուրս գա, այսինքն` առանց շահույթի, միայն ինքնարժեքով վաճառի, իրեն ձեռնտու է»,– ասաց Գևորգյանը։
Հայաստանում շաքարավազ չի արտադրվում. Հակամրցակցային մարմինն ուսումնասիրում է շաքարի շուկան
Ու թեև, հանձնաժողովի նախագահը փաստեց, որ այս բիզնես–քաղաքականությունն այսօր ընդունված է ամբողջ աշխարհում, բայց հայկական ընկերությունների նկատմամբ ՏՄՊՊՀ–ն որոշել է նախազգուշացում կիրառել։
Կոնյակը կհամեմատվի մթերվող խաղողի հետ. ՏՄՊՊՀ–ն անբարեխղճություն է նկատում
Իսկ այս բիզնես–քաղաքականությունից տուժող ընկերութոյւններին Գեղամ Գևորգյանը խորհուրդ է տալիս չսահմանափակվել մեկ ապրանքատեսակով ու ավելացնել իրենց տեսականին։ Այլապես կշարունակեն տուժել։
