ԵՐԵՎԱՆ, 28 սեպտեմբերի — Sputnik. Հայտնի ու սիրված դերասան Արմեն Ջիգարխանյանն այսօր իր ղեկավարած թատրոնում ներկա է եղել «Չառլիի մորաքույրը» ներկայացման պրեմիերային ու գոհ մնացել դերասանների խաղից։ Այս մասին հայտնում է ՌԻԱ Նովոստին։
Հանդիսատեսը ծափերով է դիմավորել ԽՍՀՄ ժողովրդական արտիստին։ Ծափերը մի քանի րոպե չեն լռել։
«Սա բարդ պիես է, ծիծաղելի չէ։ Սա մեր կյանքը չէ, դրա համար էլ այս պիեսը դժվար է խաղալ, դերասանները լավ են աշխատել», – ներկայացումից հետո ասել է Ջիգարխանյանը։
«Չառլիի մորաքույրը» ներկայացումը բեմադրվել է անգլիացի դրամատուրգ Բրենդոն Թոմասի պիեսի հիման վրա: Այս պիեսի մոտիվներով է ստեղծվել նաև «Բարև ձեզ, ես ձեր մորաքույրն եմ» հայտնի ֆիլմը, որի գլխավոր դերակատարներից մեկը Արմեն Ջիգարխանյանն է։
Օգոստոսին դերասանը հայտնվել էր հիվանդանոցում։ Ավելի ուշ հայտնի դարձավ, որ նա պրոֆիլակտիկ պլանային բուժում էր ստացել։
Դերասանի ընկեր Արթուր Սողոմոնյանն էլ Sputnik Արմենիային հայտնել էր, որ Արմեն Ջիգարխանյանը պատրաստվում է Հայաստան գալ։
Հիշեցնենք, որ օրերս տեղեկություն տարածվեց, որ Ջիգարխանյանը միացել է նախկին կնոջ հետ։ Սեպտեմբերի 18-ին համացանցում հայտնվեց Արմեն Ջիգարխանյանի և Տատյանա Վլասովայի համատեղ լուսանկարը, որը հրապարակել էր Տատյանայի որդին` Ստեփանը։ «Ավելացնելու բան չկա։ Հասկանալի է`կես դար ամուր կառուցածը ոտքով չի փլվի, այն էլ պատահական մարդկանց պատճառով»,– լուսանկարին կից գրել էր նա։
Արմեն Ջիգարխանյանը դերասանուհի Տատյանա Վլասովայից բաժանվել էր 2015թ. սեպտեմբերին: Դրանից անմիջապես հետո մամուլում հայտնվեց Վիտալինա Ցիմբալյուկ Ռոմանովսկայի հետ հարցազրույցը, որում կինը պատմել էր Արմեն Ջիգարխանյանի հետ հարաբերությունների մասին:
2017 թվականի հոկտեմբերին լրատվամիջոցները սկսեցին քննարկել Ջիգարխանյանի ու Վիտալինայի բաժանման թեման, որը հանգուցալուծվեց 2018 թվականի նոյեմբերին, երբ նրանք պաշտոնապես ամուսնալուծվեցին։
