ԵՐԵՎԱՆ, 24 սեպտեմբերի — Sputnik. ՀՀ պաշտպանության նախարար Դավիթ Տոնոյանին մտահոգում է գեներալ Մանվել Գրիգորյանի կարգավիճակը։ Այս մասին լրագրողների հետ զրույցում ասաց Տոնոյանը։
«Իմ զինակցի կարգավիճակի հետ կապված եմ մտահոգ։ Գեներալ Մանվել Գրիգորյանի այսօրվա կարգավիճակը շատ մտահոգիչ է ոչ միայն ինձ, այլև բոլոր երկրապահների համար»,–ասաց նախարարը։
Հիշեցնենք, որ այսօր Մանվել Գրիգորյանի դեմ հարուցված քրգործով դատական նիստի ժամանակ նրա պաշտպանները խափանման միջոց կալանքը գրավով փոխարինելու միջնորդություն էին ներկայացրել։ Նրա պաշտպանները նշում էին, որ Գրիգորյանի առողջական վիճակն անհամատեղելի է կալանքի հետ։ Դատարանը, սակայն, մերժեց միջնորդությունը։
Գրիգորյանն, ի դեպ, հունիսի 6–ից բուժում է ստանում «Նաիրի» ԲԿ–ում։
Ղարաբաղյան հակամարտությունը դեռևս անվտանգության սպառնալիքի աղբյուր է. ՀԱՊԿ գեներալ
Գրիգորյանը մեղադրվում է 6 հոդվածով` ապօրինի զենք-զինամթերք պահելու, ավելի քան 101 միլիոն դրամի գույք յուրացնելու, ավելի քան 1 միլիարդ դրամի հարկերի վճարումից խուսափելու, պետական միջոցներից ավելի քան 1 միլիարդ դրամ վատնելու և շորթմամբ 37 միլիոն դրամ արժողությամբ գույքի հափշտակությունը կազմակերպելու մեջ:
Նրան մեղադրանք է առաջադրվել 2018 թ. հունիսի 19-ին։
