ԵՐԵՎԱՆ, 20 սեպտեմբերի - Sputnik. Հրայր Թովմասյանի պաշտոնանկության մասին՝ «Իմ քայլը» խմբակցության ներկայացրած նախագիծը կքննարկվի հոկտեմբերի 1-ից ոչ շուտ։
Այսօր ԱԺ–ում լրագրողների հետ զրույցում այս մասին ասաց ԱԺ Պետաիրավական հանձնաժողովի նախագահ, «Իմ քայլը» խմբակցության անդամ Վլադիմիր Վարդանյանը։
«Օրենքն ասում է` առաջիկա հերթական նիստերից մեկում։ Որպեսզի տարընթերցումներ չլինեն, ենթադրվում է, որ այն կընդգրկվի հանձնաժողովի առաջիկա նիստերից մեկի օրակարգում, այնուհետև՝ նաև ԱԺ լիագումար նիստում»,– ասաց Վարդանյանը։
Նշենք, որ ԱԺ հաջորդ քառօրյա նիստը նախանշված է հոկտեմբերի 1-ին։ Ասել է թե՝ նախագծի քննարկման ամենամոտ ժամկետը կարող է լինել հոկտեմբերի 1-ը։
Վլադիմիր Վարդանյանը հերքեց նախագծի մասին այն տեսակետը, թե դրանով իշխանությունը փորձում է ճնշում գործադրել ՍԴ-ի և Հրայր Թովմասյանի նկատմամբ`հայտարարելով, որ գործընթացը բացառապես իրավաքաղաքական է։
«Մենք իրականացնում ենք Սահմանադրությամբ մեզ վերապահված լիազորությունները։ Սա այն գործընթացն է, որ նախատեսված է ԱԺ կանոնադրությամբ»,-ասաց Վարդանյանը` հավելելով, որ վերջնական որոշումը կկայացնի ՍԴ-ն` քննության առնելով ԱԺ դիմումը։ Ինչ վերաբերում է նախագծում Հրայր Թովմասյանի պաշտոնանկության համար ներկայացված հիմքերին՝ դրանք հանձնաժողովի նախագահը բավարար է համարում, բայց և շեշտում` «Հիմքերի գնահատումը ՍԴ-ի տիրույթում է»։
«Փոթորիկ մի բաժակ ջրում». ո՞վ է կազմել Քոչարյանի գործով ՍԴ դիմումը, և ի՞նչ կապ ունի Elawphant–ը
Նշենք, որ ԱԺ որոշման նախագծում Հրայր Թովմասյանի պաշտոնանկության հիմնական հիմք է ներկայացված այն, որ Քոչարյանի փաստաբանների դիմումը քննելիս նա հաշվի չի առել այն հանգամանքը, որ Քոչարյանն իր փաստաբան Արամ Օրբելյանի մկրտության ու հարսանիքի քավորն է, որ Հրայր Թովմասյանը ՀՀԿ–ի, Սերժ Սարգսյանի ու Ռոբերտ Քոչարյանի հետ փոխկապակցված անձ է և նախկինում հրապարակավ կարծիքներ ու պնդումներ է ներկայացրել 2008թ.–ի մարտի 1–ի իրադարձությունների ու դրանց հաջորդած դատավարությունների վերաբերյալ։
Խոսելով Թովմասյան– Օրբելյան հարաբերությունների մասին՝ Վլադիմիր Վարդանյանը, մասնավորապես, ասաց. «Քավոր–սանիկական հարաբերությունները բավարար հիմք չեն, բայց հարաբերությունների բնույթը, փոխկապակցվածությունը կարող են բավարար լինել։ Չպետք է մոռանանք, որ ՍԴ–ում կողմի ներկայացուցիչ էր հանդիսանում ոչ թե Արամ Օրբելյանը, այլ Արամ Վարդևանյանը, որի հետ կապեր չկան։ Բայց գործի նյութերի ուսումնասիրությունը, Արամ Օրբելյանի հայտարարությունները հանգում են նրան, որ ՍԴ դիմումի կազմման դեպքում պարոն Օրբելյանը որոշակի մասնակցություն է ունեցել»։
Ես Սահմանադրական դատարանի նախագահ եմ. Հրայր Թովմասյանը` ՍԴ դատավոր–ՍԴ անդամ լինելու մասին
Վարդանյանը հիշեցրեց, որ Վճռաբեկ դատարանի որոշման մեջ Արամ Օրբելյանի անունը շրջանառվում է։ Նրա համոզմամբ՝ ՍԴ-ն ու Հրայր Թովմասյանը պետք է անդրադառնային այդ հարցին, բայց չեն անդրադաձել։
«Այդ հանգամանքը կարող էր և՛ կաշկանդել, և՛ չկաշկանդել, բայց, համենայն դեպս, դրան պետք է անդրադարձ լիներ»,– ասաց Վարդանյանը։
Հիշեցնենք՝ «Իմ քայլը» խմբակցության հեղինակած նախագիծը սեպտեմբերի 19-ին հրապարակվել է ԱԺ պաշտոնական կայքում, և առաջիկայում կքննարկվի Պետաիրավական հանձնաժողովում։
