Փաստաբանի փոխանցմամբ՝ խնդիրն ամբողջությամբ իրավական հարթության մեջ է: Արարքը, որը մեղսագրվել է պարոն Գասպարյանին, ունեցել է տարբեր խմբագրություններ, և երբ արարքը համարվել է «ավարտված», գործել է այլ խմբագրություն:
«Ներկայիս խմբագրության հետ, որով մեղադրանք է առաջադրվել, առկա է կոնֆլիկտ, և արարքներն էլ, կոպիտ ասած, տարբեր են, տարբեր մեղքերի տեսքով, հետևաբար, պետք է կիրառվի հինը, եթե համարում են, որ եղել է հանցանք, բայց գնացել են նորին՝ առանց հաշվի առնելու մեղքի տեսակը, որը տարբեր է հին և նոր խմբագրություններում»,- նշում է Տիգրան Աթանեսյանը՝ հավելելով, որ դա ինքնին հանգեցնում է հանցակազմի տարրերից մեկի բացակայությանը, ինչն իր հերթին բերում է հանցակազմի բացակայությանը:
Տեղեկատվությունն այն մասին, որ Վլադիմիր Գասպարյանը փոխհատուցել է պատճառված վնասը, չի համապատասխանում իրականությանը: Փաստաբանը ենթադրում է, որ եղել է թյուրիմացություն: Վնասը ենթադրաբար հատուցել են այդ արարքը կատարած մարդիկ, ուստի պարոն Գասպարյանը ոչ մի կապ չունի վնասի հատուցման հետ:
Տիգրան Աթանեսյանը նշում է, որ իր պաշտպանյալն այս փուլում նպատակահարմար չի գտնում ցուցմունք տալ: «Գործը բացահայտվել է 2018թ.-ի ամռանը: Եթե արարքը ենթադրաբար եղել է 2003-04 թվականներին, եղել է մինչև 2018 թվականը, ապա ինչու՞ է մեղադրանք առաջադրվում Ռազմական ոստիկանության պետին, ով պաշտոնավարել է մինչև 2010 թվականը»,- տարակուսում է փաստաբանը և հավելում, որ մինչև 2018 թվականը պաշտոնավարած այլ անձանց մեղադրանք չի առաջադրվել, հետևաբար առկա է պարզապես թիրախավորված հետապնդում, հակառակ դեպքում մեղադրանք պետք է առաջադրվի հետագա տարիներին պաշտոնավարած բոլոր ՌՈ պետերին, այլ ոչ միայն գործով անցնող պետին:
Հիշեցնենք, որ երեկ` սեպտեմբերի 18–ին, ՀՀ նախկին ոստիկանապետ Վլադիմիր Գասպարյանին մեղադրանք է առաջադրվել իշխանությունը չարաշահելու համար:
