ԵՐԵՎԱՆ, 19 սեպտեմբերի — Sputnik. ԱԱԾ և ոստիկանության արդեն նախկին ղեկավարների աշխատանքից վարչապետ Նիկոլ Փաշինյանի դժգոհության մասին հայտարարություններում տրամաբանական անհամապատասխանություն կա։ Դեռ երկու ամիս առաջ Փաշինյանը գեներալի կոչումներ էր շնորհել Արթուր Վանեցյանին և Վալերիյ Օսիպյանին։ Այդ մասին այսօր կայացած մամուլի ասուլիսում հայտարարեց քաղաքական տեխնոլոգ Կարեն Քոչարյանը։
Հիշեցնենք` սեպտեմբերի 16-ին ՀՀ վարչապետ Նիկոլ Փաշինյանը հայտնեց, որ ստորագրել է ԱԱԾ տնօրեն Արթուր Վանեցյանի հրաժարականի միջնորդությունը։ Դրան հաջորդեց Վանեցյանի հայտարարությունը։ Ոստիկանապետ Վալերիյ Օսիպյանը պաշտոնից ազատվեց սեպտեմբերի 18-ին և նշանակվեց ՀՀ վարչապետի գլխավոր խորհրդական։
«Այստեղ ընդամենը մեկ վարկած կարող է լինել. դժգոհությունը կուտակվել է վերջին մեկ–երկու ամսվա ընթացքում։ Բայց այդ դեպքում վարչապետը պետք է պարզաբանի, թե հատկապես ինչից է դժգոհ», – կարծում է Քոչարյանը։
Նրա հետ համաձայն է Հայաստանի Դեմոկրատական կուսակցության առաջնորդ Արամ Սարգսյանը։ Նրա կարծիքով` վարչապետը, որն հաճախ ցույց է տալիս, թե հասարակության հետ խիստ թափանցիկ աշխատանք է տանում, կարող է պարզաբանումներ ներկայացնել։ Սարգսյանը չի բացառում, որ Վանեցյանի բարձր վարկանիշը կարող էր մտահոգել երկրի բարձրագույն ղեկավարությանը։ ՀՀ կառավարության աշխատակազմի ղեկավար Էդուարդ Աղաջանյանը, երեկ մեկնաբանելով Վանեցյանի և Օսիպյանի հրաժարականները, հայտարարել էր, որ վարչապետ Նիկոլ Փաշինյանին չի գոհացրել նրանց գործունեությունը։
Էմոցիոնալ ազգ, կամ Վանեցյանի երկրպագու դարձածները երեկ նրա մեջ հակառակորդ էին տեսնում
Կարեն Քոչարյանը նաև կարծում է, որ պետք է առանձնացնել Օսիպյանի հրաժարականը Վանեցյանի պաշտոնանկումից։
«Օսիպյանն այդպես էլ «ֆիգուր» չդարձավ, նրանից և նրա գլխավորած գերատեսչությունից դժգոհությունն իսկապես շատ առումներով օբյեկտիվ բնույթ է կրել», – ասաց քաղտեխնոլոգը։
Ինչ վերաբերում է Վանեցյանին, ապա նրա հայտարարությունն ամբողջովին քաղաքական բնույթ է կրել։ Դա քաղաքական գործունեության հայտ էր։
Ընդհանուր առմամբ, փորձագետի խոսքով, Փաշինյանի թիմում կան խնդիրներ, ավելին` այդ խնդիրների մասին խոսվել է մեկ տարի առաջ։
«Հապճեպ ձևավորված հեղափոխական թիմը չէր կարող միակուռ լինել։ Եվ ներկա անախորժությունները շատ առումներով բնորոշ են հետհեղափոխական գործընթացներին», – նշեց փորձագետը։
Երկու խոսնակները հակված են այն կարծիքին, որ կառավարության ղեկավարը իշխանության բազմաթիվ թևերի լիովին չի կարողանում վերահսկել, ինչի արդյունք և ծնվում են աղմկահարույց հրաժարականները։
Իշխանության անկանխատեսելիությունը Կարեն Քոչարյանի և Արամ Սարգսյանի համար ևս մի կարևոր խնդիր է։ Այն առկա է ինչպես ներքին, այնպես էլ արտաքին քաղաքականության մեջ։
Հայտնի է` ովքեր կփոխարինեն Վանեցյանին ու Օսիպյանին
Հիշեցնենք`Արթուր Վանեցյանն իր հրաժարականի տեքստում գրել էր, որ պետականաշինության տրամաբանության շրջանակներում որոշումների տարերայնությունը, գործողությունների հախուռնությունը, առաջնայինը երկրորդականից, իսկ անցողիկը մնայունից չտարբերելու գործելաոճն այն ճանապարհը չէ, որը տանում է դեպի նպատակների իրականացում։
