ԵՐԵՎԱՆ, 18 սեպտեմբերի – Sputnik. «Իմ քայլը» խմբակցության ղեկավար Լիլիթ Մակունցը կարծում է, որ վերջին օրերին տեղի ունեցող պաշտոնանկությունները բնականոն գործընթացներ են։ Այս մասին Մակունցն ասաց լրագրողներին «Քաղաքացիական պայմանագիր» կուսակցության վարչության նիստից առաջ։
«Պաշտոնները հավերժ չեն, և հասկանալի է, որ դրանք կարող են փոխվել»,–ասաց նա։
Հարցին, թե վարչության նախորդ նիստի ժամանակ արդյո՞ք քննարկվել են հրաժարականների հարցը` Մակունցը պատասխանեց, որ վարչության նիստի ընթացքում տարբեր հարցեր են քննարկվում, սակայն պաշտոնանկության հարցեր չեն քննարկվում։
Լրագրողները հետաքրքրվեցին, թե ինչպե՞ս կգնահատի ԱԱԾ նախկին տնօրեն Արթուր Վանեցյանի հրաժարականի հայտարարությունը, ինչին ի պատասխան Մակունցը նշեց, որ ԱԱԾ տնօրենի պաշտոնանկության հետ կապված այն, ինչ հնարավոր էր, ներկայացրել է ՀՀ վարչապետը։
«Բացի այդ, պաշտոնանկությունների կամ հրաժարականների հետ կապված հայտարարություններ են անում իրենք` պաշտոնանկ եղողները»,–ասաց նա։
Մեկ այլ հարցի, թե ոստիկանության պետի պաշտոնում քննարկվում է նաև ակտիվիստ Վիլեն Գաբրիելյանի անունը, հնարավո՞ր է նա այդ պաշտոնին նշանակվի, Մակունցը պատասխանեց, որ այդ մասին մամուլից է իմացել։
Ինչ վերաբերում է նոր պաշտոնանկություններին, ապա Մակունցը վստահեցրեց, որ չի կարող ասել` կլինեն նոր պաշտոնանկություններ, թե ոչ, քանի որ չունի նման տեղեկություն։
Ինչի մասին է խոսել Օսիպյանը խորհրդակցության ժամանակ. տեսանյութ
Հիշեցնենք, որ օգոստոսի 16–ին ՀՀ վարչապետ Նիկոլ Փաշինյանը հայտնեց, որ ստորագրել էր Վանեցյանի հրաժարականի միջնորդությունը։ Դրան հաջորդեց Վանեցյանի հայտարարությունը, իսկ ավելի ուշ ՀՀ նախագահ Արմեն Սարգսյանը ստորագրեց հրամանագիրը։
ՀՀ նախագահն այսօր` սեպտեմբերի 18–ին, հրամանագիր էր ստորագրել Վալերիյ Օսիպյանին ոստիկանության պետի պաշտոնից ազատելու մասին։ ՀՀ ոստիկանապետի պարտականությունները կատարելու է Ոստիկանության պետի առաջին տեղակալ Արման Սարգսյանը։ Օսիպյանը հայտարարություն էր տարածել՝ նշելով, որ իր հեռանալու պատճառների մասին կխոսի ավելի ուշ։ Օսիպյանն արդեն նշանակվել է ՀՀ վարչապետի գլխավոր խորհրդական։
