ԵՐԵՎԱՆ, 17 սեպտեմբերի — Sputnik. ԱԱԾ նախկին տնօրեն Արթուր Վանեցյանը հավաստիացնում է, որ հրաժարականի տեքստն ինքն է գրել։ Այս մասին Վանեցյանն ասաց այսօր` լրագրողների հետ զրույցում։
Հայտնել էինք, որ երեկ ՀՀ վարչապետ Նիկոլ Փաշինյանի խոսնակ Վլադիմիր Կարապետյանն ասել էր, թե հույս ունի` Վանեցյանի հրաժարականի տեքստի հեղինակը քրեական պատասխանատվությունից «թյուրիմացաբար» խուսափած կոռուպցիոներների PR գրասենյակները չեն:
«Տեքստը գրել եմ ես, խմբագրել է խորհրդականս` Արմեն Դավթյանը։ Միամտություն եմ համարում, որ ինձ կարող է փորձեն կապել ինչ–որ կոռուպցիոներների PR գրասենյակների հետ»,–ասաց նա։
Նա նշեց նաև, որ երբ ընդունել է հրաժարական տալու որոշումը, որևէ քաղաքական ուժի հետ չի խորհրդակցել. Միայն ընտանիքի` կնոջ, երեխաների ու ծնողների։
«Որոշումս շատ մտածված ու հստակ էր»,–ասաց նա։
Նա նշեց նաև, որ այս պահին չի մեկնաբանել իր հրաժարականի տեքստը։
Փաշինյանն Անվտանգության խորհրդի նիստ է անցկացրել
Նրա խոսքով` տեքստն արդեն բոլորը կարդացել ու իրենց գնահատականները տվել են։ Վանեցյանը հավաստիացրեց` եթե առաջիկայում անհրաժեշտություն առաջանա այն մեկնաբանել, կմեկնաբանի։
Հարցին, թե գիտակցո՞ւմ է` հրաժարականի տեքստում ինչ ձևակերպումներ է արել` Վանեցյանը պատասխանեց, որ միաշնանակ գիտակցում է։
«Իմ բոլոր քայլերը ես գիտակցել եմ։ Իմ պաշտոնավարման 1.5 տարիների ընթացքում աշխատանքս իրականացրել եմ պատվով, մեծ պատասխանատվությամբ և արդյունքը բոլորի համար ակնհայտ է»,–ասաց նա։
Հիշեցնենք, որ երեկ ՀՀ վարչապետ Նիկոլ Փաշինյանը հայտնեց, որ ստորագրել է Վանեցյանի հրաժարականի միջնորդությունը։ Դրան հաջորդեց Վանեցյանի հայտարարությունը։ «Այս որոշումը կայացրել եմ նույնքան վստահ, որքան այն մեկը, երբ մեր երկրի համար բախտորոշ փուլում համաձայնվեցի ստանձնել Ազգային անվտանգության ծառայության տնօրենի պաշտոնը։ Մեկուկես տարվա իմ գործունեությունը միշտ բոլորիդ աչքի առջև է եղել, և ամեն քայլ արել եմ մեկ սկզբունքով` Հայրենիքն ու սպայի պատիվը վեր են ամեն ինչից»,–գրել էր Վանեցյանը:
Արթուր Վանեցյանից հետո պաշտոնից կազատվեն նաև Տոնոյանն ու Օսիպյանը. «Ժողովուրդ»
Նրա խոսքով` պետականաշինության տրամաբանության շրջանակներում որոշումների տարերայնությունը, գործողությունների հախուռնությունը, առաջնայինը երկրորդականից, իսկ անցողիկը մնայունից չտարբերելու գործելաոճն այն ճանապարհը չէ, որը տանում է դեպի նպատակների իրականացում։
