ԵՐԵՎԱՆ, 16 սեպտեմբերի - Sputnik. ՀՀ Ազգային ժողովում Էդգար Առաքելյանին կփոխարինի «Իմ քայլը» կուսակցությունների դաշինքի համապետական ընտրական ցուցակում հաջորդ թեկնածուն՝ Արթուր Մանուկյանը:
«ԿԸՀ-ն ներկայացրել է ԱԺ-ի պատգամավոր ընտրված և լիազորությունները վաղաժամկետ դադարեցրած պատգամավորի մանդատը հաջորդ թեկնածուին տրամադրելու մասին արձանագրությունը, ըստ որի՝ մանդատը տրվում է «Իմ քայլը» կուսակցությունների դաշինքի համապետական ընտրական ցուցակի հաջորդ թեկնածու Արթուր Մանուկյանին»,- ԱԺ-ում հայտարարեց խորհրդարանի խոսնակ Արարատ Միրզոյանը:
«Իմ քայլը» խմբակցությունը նիստ է գումարել. ներկա է նաև Փաշինյանը. տեսանյութ
Մանուկյանը երդման արարողությամբ ստանձնեց պատգամավորի պարտականությունները:
Հիշեցնենք, որ ավելի վաղ «Իմ քայլը» խմբակցության անդամ Էդգար Առաքելյանը պատգամավորական մանդատը վայր էր դրել՝ այդ մասին տեղեկացնելով իր ֆեյսբուքյան էջում:
«Պատճառները մաքուր անձնական տիրույթում են: Քաղաքականությամբ զբաղվող անձը պիտի օժտված լինի քաղաքականությամբ զբաղվելու համար անհրաժեշտ որակներով: Խորապես հավատացած եմ, որ ինձ մոտ այդ որակներից մի քանի կարևորագույնները բացակայում են, ինչն ինձ անհամատեղելի է դարձնում այդ գործունեության հետ»,-գրել էր Առաքելյանը, հավելելով, որ ամենայն հավանականությամբ՝ կվերադառնա ՏՏ ոլորտ` իրեն հարազատ ու սիրելի կոդերի աշխարհ և դրանով ավելի մեծ օգուտ կբերի մեր երկրին:
