ԵՐԵՎԱՆ, 14 սեպտեմբերի – Sputnik. Արագած լեռան վրա արջի զոհ դարձած լեհ երիտասարդի դին գտնվում է Աշտարակի դիահերձարանում։ Sputnik Արմենիային այս մասին հայտնեցին Աշտարակի բուժկենտրոնից։
Նրա նշանածի առողջական վիճակի և գտնվելու վայրի վերաբերյալ ստույգ տեղեկություններ առայժմ չկան, սակայն հիվանդանոցից հայտնեցին, որ նրան տարել են ոստիկանները։
«Նա շոկային վիճակում էր, չէր կարողանում խոսել»,– մեզ ասացին բուժհաստատության աշխատակիցները։
Շտապօգնության բրիգադի տվյալներով` Լեհաստանի քաղաքացին արջի հարձակման հետևանքով է ընկել ժայռից։
Ավելի վաղ ԱԻՆ–ը հայտնել էր, որ այսօր, ժամը 14:26-ին «911» ծառայությունը Լեհաստանի Հանրապետության քաղաքացի Մարգո Ժ.-ից ահազանգ է ստացել, որ ինքն ու ընկերը (նույնպես Լեհաստանի Հանրապետության քաղաքացի) բարձրացել են Արագած լեռ, արջը հարձակվել է իրենց վրա։
Sputnik Արմենիային հայտնի էր դարձել, որ Հայաստան եկած զբոսաշրջիկները նշանված էին։ արջը նրանց վրա է հարձակվել է մոտ 3500 մետր բարձրության վրա։ Կենդանին ամուր բռնել է տղային, սկսել է գլորվել ու տղայի հետ ժայռից գահավիժել է ցած։ Աղջիկն անմիջապես ահազանգել է փրկարարական ծառայություն։
Դեպքի վայր եկած հրշեջ-փրկարարներն ու իրավապահները հայտնաբերել են երիտասարդի դին, որի գլուխն անճանաչելիորեն ջնջխված է եղել։
