ԵՐԵՎԱՆ, 14 սեպտեմբերի – Sputnik. Այսօր Սևանում անցկացվող ձկան փառատոնի ժամանակ հրավառություն կլինի ուղիղ Սևանի կենտրոնից։ Այս մասին ասաց ՀՀ վարչապետ Նիկոլ Փաշինյանը, որն ընտանիքով մեկնել է Սևանում` փառատոնին մասնակցելու։
«Այսօր ժամը 8–ին հրավառությունը լինելու է Սևանա լճից` նավի կամ ինչ–որ սարքավորման վրայից։ Աննախադեպ տեսարան է լինելու, անպայման եկեք Սևան»,–ասաց նա։
Վարչապետի խոսքով` փառատոնի միջոցով մենք շնորհակալություն ենք հայտնում Սևանին, սակայն Սևանն էլ մեզ է այսօր շնորհակալություն ասել։ Փաշինյանի խոսքով` Սևանի ջրի մակարդակը ևս 1 սմ–ով և անցյալ տարվա համեմատ 3 սմ–ի ավելացում կա։
«Ուրախ եմ, որ փառատոնային կուլտուրան զարգանում է, քանի որ փառատոների շնորհիվ երկրում տրամադրությունը փոխվում ու բարձրանում է։ Մեր առօրյան պետք է ավելի ուրախ կազմակերպելու առիթները բաց չթողնենք։ Բացի այդ, նման միջոցառումները կարևոր ներդրում են ՀՀ տնտեսության մեջ, քանի որ զարգացնում են զբոսաշրջությունը, ռեստորանային բիզնեսը»,–ասաց Փաշինյանը։
Գագիկ Գոզեյանը մոտ 8 ժամում հատել է Սևանն ու իր քայլը նվիրել Ապրիլյանի հերոսներին. տեսանյութ
Նա հույս հայտնեց, որ կառավարությունն ու Սևանի շրջանում բիզնես իրականացնողները կկարողանան Սևանի զարգացման վերաբերյալ իրենց պատկերացումները համադրել։
Միջոցառման վարող Եգոր Գլումովն էլ ասաց, որ Փաշինյանը ոչ միայն սիրում է ձուկ ուտել, այլ նաև պատրաստել։ «Ես անձամբ հիշում եմ` ինչպես էր Փաշինյանը ձուկ պատրաստում»,–ասաց նա։
Հիշեցնենք, որ փառատոնը կյանքի է կոչվել Գեղարքունիքի մարզպետ Գնել Սանոսյանի և «Ռեստորանների հայկական միության» նախաձեռնությամբ։ Փառատոնն առաջին անգամ է կազմակերպվում՝ հավակնելով դառնալ ամենամյա։
