Պետք է պահանջել, որ իշխանությունն անընդհատ տեղեկություններ հաղորդի, թե արտաքին պարտքի օգտագործումը ինչպես է կատարվում, օրինակ` դպրոց ենք կառուցում, ջրանցք ենք կառուցում կամ ծախսում ենք առողջապահության, կրթության համակարգի համար։ Sputnik Արմենիային այս մասին ասաց Վահագն Խաչատրյանը։
«Այդ ամենը պետք է հաղորդվի, և հասկանանք` մենք հասել ենք մեր նպատակին, թե ոչ։ Արտաքին պարտք վերցնելն ինքնանպատակ չպետք է լինի․ կոռուպցիոն ռիսկերը պետք է բացառվեն։ Մենք չենք ասում` պետական պարտք մի վերցրեք․ առանց դրա չի լինի, բայց այդ պարտքը պետք է արդյունավետ օգտագործել»,– ասաց Խաչատրյանը։
Տնտեսագետի խոսքով` պետք է ճիշտ հարցադրում անել՝ արդյո՞ք մենք ունենք այն ամենը, ինչի համար արտաքին պարտք ենք վերցրել։
Նա շեշտեց` մենք պետք է պահանջենք, որ պետությունն անընդհատ հաշվետվություն տա արտաքին պարտքի օգտագործման վերաբերյալ։
Հիշեցնենք` վարչապետ Նիկոլ Փաշինյանը Facebook սոցիալական ցանցի իր էջում գրել է, որ այս տարվա օգոստոսին 2015-ից ի վեր առաջին անգամ արձանագրվել է արտաքին պետական պարտքի նվազման միտում: Վերջին 15 ամիսների ընթացքում Հայաստանի արտաքին պետական պարտքը նվազել է 120 մլն դոլարով կամ 2.1%-ով:
