ԵՐԵՎԱՆ, 11 սեպտեմբերի — Sputnik. Շիրակի մարզում 114 բազմաբնակարան շենքեր վթարային են համարվում ու, չնայած այս հանգամանքին, վերջին անգամ մարզում 2003–ին են վթարայինների ամրակայման աշխատանքներ կատարվել։ Sputnik Արմենիայի հետ զրույցում այս մասին ասաց Շիրակի մարզի քաղաքաշինության վարչության պետ Ալբերտ Մարգարյանը։
«Մարզի շենքերը վթարային են դարձել Սպիտակի երկրաշարժի հետևանքով։ 114 շենքերից 106–ը երրորդ, 8–ը` չորրորդ կարգի վթարային են։ Այդ շենքերը 2458 բնակարաններ են ներառում։ Ի դեպ, վթարային շենքերի մեծ մասը` 92–ը, հենց Գյումրիում են»,– ասաց նա։
Նրա խոսքով` դրանց ամրացման համար անհրաժեշտ է ավելի քան 24-25 մլրդ դրամ. ամեն տարի, երբ մարզպետարանը կազմում է միջնաժամկետ ծախսային ծրագիրը, ներառում են նաև վթարային մի քանի շենքեր և ցուցակն ուղարկում քաղաքաշինության կոմիտե։ Չնայած դրան, ըստ Մարգարյանի, մարզում վթարային շենքերի ամրակայման և վերականգնման աշխատանքներ 2003 թվականից հետո չեն կատարվել։ Պատճառը ֆինանսական խնդիրներն են։ Իսկ մինչ 2003–ը, պետբյուջեի ու Համաշխարհային բանկի վարկի շնորհիվ, ինչպես նաև «Լինսի» հիմնադրամի միջոցով ինչպես նոր շենքեր էին կառուցում, այնպես էլ` վթարայինների ամրացման աշխատանքներ իրականացնում։
«2003–ից հետո միայն չորրորդ կարգի վթարային 4 շենքերի բնակիչներին փոխհատուցում է տրվել` բնակարանի կամ գումարի տեսքով»,–ասաց նա։
Հայաստանի ճարտարապետների միության նախագահ Մկրտիչ Մինասյանն էլ մեզ հետ զրույցում նշեց, որ սեպտեմբերի 10–ին տեղի ունեցած երկրաշարժը 6 բալ ուժգնություն ուներ, ինչը քիչ չէր, ու սա պետք է վթարայինների խնդիրը շտապ լուծելու ազդակ լինի։ Նրա խոսքով` վթարայինների խնդիրը լուծելով ոչ թե բարեկարգման հարց են լուծելու, այլ մարդկային կյանքեր են փրկելու։
«Գիտեմ, որ Գյումրիում վթարայինների, անօթևանների հետ կապված հաշվառում է եղել։ Մենք կարծում էինք, որ աղետի գոտի հասկացություն չկա, բայց այդպես չէ, արի ու տես, որ դեռ անօթևան մարդիկ էլ կան։ Այսինքն` մենք մեզ էինք խաբում ու ասում ենք` ամեն ինչ լավ է»,–ասաց նա։
Նրա խոսքով` Սպիտակի հայտնի երկրաշարժից հետո մի շարք շենքեր վթարային էին դարձել, որոնք քանդեցին։ Հիմա էլ, ըստ նրա, եթե վթարային շենքը պատմամշակութային արժեք չէ, ապա պետք է քանդեն, քանի որ վերականգնման ծախսերը շատ են։ Մինասյանը նշեց նաև, որ շտապ կառուցվող շենքերը, ինչպիսիք կառուցվել են Սպիտակի երկրաշարժից հետո Գյումրիում, 50-70 տարվա «կյանք ունեն»։ Հետո դրանք պետք է քանդեն, քանի որ մաշվում են ու վթարային դառնում։
Ինչ վերաբերում է նոր կառուցվելիք շենքերի սեյսմակայուն լինել–չլինելուն, ապա, ըստ ճարտարապետների միության նախագահի, այդ խնդիրը կարելի է լուծված համարել։ Մինասյանը հավաստիացնում է, որ շինարարները նոր կառուցվող շենքերի` սեյսմակայուն լինելն անպայման հաշվի են առնում։
Հիշեցնենք, որ երեկ երեկոյան 20:22-ին երկրաշարժ է գրանցվել Հայաստան-Վրաստան սահմանային գոտում՝ Բավրա գյուղից 13 կմ հյուսիս-արևելք։ Էպիկենտրոնային գոտում ստորգետնյա ցնցման ուժգնությունը կազմել է 6-7 բալ:
Ըստ նախնական տվյալների՝ երկրաշարժը զգացվել է ՀՀ Շիրակի, Լոռու, Տավուշի, Արագածոտնի, Արմավիրի մարզերում և Երևան քաղաքում:
