ԵՐԵՎԱՆ, 11 սեպտեմբերի — Sputnik. Ազգային ժողովն այսօր ընդունեց ՀԱՊԿ-ում գործընկերոջ կարգավիճակ ավելացնելու մասին օրինագիծը։
Նախագիծն ընդունվեց միաձայն։ Ըստ այդ նախագծի` ՀԱՊԿ–ը ոչ միայն դիտորդի կարգավիճակ է ունենում, այլ ավելի բարձր` գործընկերոջ։
Նշենք, որ երեկ ՀՀ արտաքին գործերի նախարարի տեղակալ Շավարշ Քոչարյանը հայտնել էր, որ դիտորդի և գործընկերոջ դեպքում կա տարբերություն:
Ադրբեջանն առանց մեր համաձայնության չի կարող դիտորդի կարգավիճակ ստանալ ՀԱՊԿ–ից. Քոչարյան
«Գործընկերն այն պետությունն է, որը շահագրգռված է խորացնել իր հարաբերությունները ՀԱՊԿ-ի ու անդամ պետությունների հետ, որը կիսում է ՀԱՊԿ-ի գաղափարախոսությունն ու մոտեցումները»,- ասել էր նա։
Հիշեցնենք, որ Հավաքական անվտանգության պայմանագրի կազմակերպությունը հիմնադրվել է 1992թ. մայիսի 15-ին Հայաստանի, Ռուսաստանի, Ղազախստանի, Ղրղզստանի, Տաջիկստանի և Ուզբեկստանի կողմից Տաշքենդում Հավաքական անվտանգության մասին պայմանագրի ստորագրմամբ: Հաջորդ տարի պայմանագրին են միացել Ադրբեջանը, Վրաստանը և Բելառուսը:
