ԵՐԵՎԱՆ, 2 սեպտեմբերի — Sputnik. Հայաստանում ոսկրածուծի փոխպատվաստման վիրահատությունը կարող է անվճար դառնալ, իսկ մի շարք բժշկական ծառայություններ արդեն անվճար են դարձել, ինչի շնորհիվ պետպատվերով բուժում ստացողների թիվն ավելացել է։ Այս մասին այսօր ասաց ՀՀ առողջապահության նախարար Արսեն Թորոսյանը վարչապետ Նիկոլ Փաշինյանի մոտ խորհրդակցության ժամանակ, որը հեռարձակվում էր Facebook–ի ուղիղ եթերով։
Թորոսյանը նշեց, որ այդ վիրահատությունը շատ բարդ է ու թանկ է` մոտ 10 միլիոն դրամ։ Միաժամանակ նման վիրահատության կարիք ունեցողները շատ չեն ու, ըստ նախարարի, պետությունը կարող է իր վրա վերցնել ծախսերը։ Նախարարը խոստացավ ավելի մանրամասն ներկայացնել անվճար փոխպատվաստման ծրագիրը սեպտեմբերի 3–ին։
Թորոսյանի խոսքով` պետության կողմից ֆինանսավորվող ծրագրերի շնորհիվ հաջողվում է փրկել մարդկանց կյանքները։ Գլխուղեղի անոթների իշեմիկ կաթվածների բուժման ծրագրով այս տարվա յոթ ամիսների ընթացքում 212 մարդ տարբեր մարզերից անհրաժեշտ բուժօգնություն են ստացել։ Նրանցից 182–ն առողջ կյանքի է վերադարձել, 30–ի կյանքը չի հաջողվել փրկել։
«Մենք այնպես ենք բաշխել բյուջեն, որ պետպատվեր ստանալու համար հերթեր չգոյանան ու բոլորն անհրաժեշտ պահին օգնություն ստանան», – տեղեկացրեց նախարարը։
Թորոսյանն ավելացրեց, որ պետությունը փոխել է նաև «Stent for Life» (սրտի անոթների ստենդավորման) ծրագրի չափանիշները, ինչի շնորհիվ վիրահատությունների թիվն ավելացել է 32%–ով։ Նրա խոսքով` այդ ծրագրի շնորհիվ զինծառայողների ծնողները, որոնք ունեն սրտանոթային հիվանդություններ, կարող են օգտվել ծառայությունների լայն շրջանակից, նույնիսկ` անվճար անել սրտի թանկարժեք վիրահատությունը։
Նախարարն ասաց նաև, որ չարորակ հիվանդությունների վիրաբուժական միջամտության անվճար կազմակերպման ծրագրով այս տարվա յոթ ամիսների ընթացքում 2300 մարդ է վիրահատվել։ Սա 135%–ով գերազանցում է նախորդ տարվա նույն ժամանակահատվածի ցուցանիշը։ Նա նշեց, որ նախատեսվում է այդ ծրագրի բյուջեն ավելացնել գրեթե երեք անգամ։ Այժմ պետությունն ամբողջովին ֆինանսավորում է վիրահատությունները ու բուժհաստատությունները մարդկանցից չպետք է ոչ մի լումա վերցնեն։
Երգիչ և կոմպոզիտոր Ալեքսանդր Ռոզենբաումը ծանր վիրահատություն է տարել
Մինչ չարորակ ուռուցքի ախտորոշումը բոլոր ծախսերը հոգում է պացիենտը, դրանից հետո արդեն պետությունը։ Ցավոք, մենք դեռ չենք կարող հոգալ քիմիաթերապիայի ծախսերը, բայց այդ ուղղությամբ էլ են աշխատանքներ իրականացվում», – ասաց Թորոսյանը։
Նախարարը նաև ներկայացրեց սանավիացիայի աշխատանքը։ Հինգ ամիսների ընթացքում ուղղաթիռով 52 հիվանդ է հիվանդանոց հասցվել, ևս երեքը իրենց հաշվին են օգտվել այդ ծառայությունից։
