ԵՐԵՎԱՆ, 31 օգոստոսի–Sputnik. Էրեբունի վարչական շրջանի պաշտոնական Facebook-յան էջում բնակիչներին ուղղված հաղորդագրություն է տարածվել շրջանի աղբահանության խնդիրների և փաստացի իրավիճակի վերաբերյալ։ Հաղորդագրության մեջ, մասնավորապես, նշվում է.
«Տեղեկացնում ենք ձեզ, որ «Սանիթեք» ընկերությունն այլևս չի կատարում իր պարտականությունները, ինչի արդյունքում վարչական շրջանում ունենք նման պատկեր»։
Հաղորդագրությամբ վարչական շրջանի պատասխանատուները հայցել են բնակիչների ներողամտությունը պատճառված անհարմարությունների համար և տեղեկացրել, որ այժմ աղբահանությունն իրականացնում է «Երևանի աղբահանություն և սանիտարական մաքրում» նորաստեղծ համայնքային հիմնարկը, որի աղբատար մեքենաներն օրեցօր ավելանում են:
Հաղորդագրության վերջում հեղինակները վստահություն են հայտնել, որ կարճ ժամանակ հետո խնդիրն ամբողջությամբ կլուծվի:
Հիշեցնենք` Երևանում աղբահանության խնդիրը սրվեց անցած տարվա ամռանը։ Աղբահանությամբ զբաղվող «Սանիթեք» ընկերությունը մի քանի անգամ տուգանվեց, բայց հարցն այդպես էլ չլուծվեց։
Երևանի քաղաքապետարանին դատի են տվել. ինչու՞ չեն հրապարակում «Սանիթեքի» պայմանագիրը
Ապրիլի 18–ի կառավարության նիստում վարչապետ Նիկոլ Փաշինյանը քաղաքապետ Հայկ Մարությանից բացատրություն պահանջեց աղբահանության վիճակի համար։ Վերջինս, ներկայացնելով իրավիճակը, խնդրեց թույլ տալ կազմակերպել աղբատարների գնման լրացուցիչ գործընթաց։
Հուլիսի սկզբին հայտնի դարձավ, որ ընկերությունը դատի է տվել Երևանի քաղաքապետարանին` պահանջելով վերադարձնել որպես տուգանք վճարած գումարը։
«Սանիթեքը» մտադիր է միջազգային արբիտրաժային դատարան դիմել, եթե քաղաքապետարանը չհամաձայնվի ճգնաժամի կարգավորման իր պայմաններին։
