ԵՐԵՎԱՆ, 30 օգոստոսի — Sputnik, Աստղիկ Սուքիասյան. «Դպրոցական իրարանցումն» արդեն նկատելի է մայրաքաղաքի բոլոր խանութներում և տոնավաճառներում. ծնողները շտապում են սեպտեմբերի 1-ի առթիվ գնումներ կատարել: Sputnik Արմենիայի թղթակիցը որոշել է պարզել, թե Երևան, Հրազդան և Աբովյան քաղաքներում ծնողների համար որքան կարժենա կրտսեր և միջին դասարանների երեխաներին դպրոց ուղարկելը:
Անցկացված սոցհարցման և տոնավաճառների գնացուցակների ուսումնասիրման արդյունքում պարզ է դարձել, որ շարքային հայ ընտանիքի բյուջեն մեկ երեխա դպրոցի պատրաստելու համար կնվազի միջինը 70 000 դրամով:
Որպես կանոն, ժամանակակից երեխաները պահանջկոտ են և չեն ցանկանում հետ մնալ համադասարանցիներից:
«Տղայիս ուզած Lego (օրթոպեդիկ) պայուսակը, պատվիրել եմ օնլայն խանութից 49.000 դրամով, մինչդեռ նույն պայուսակը մոլերում արժե 150.000 դրամ: Վերջերս նկատեցի, որ զեղչել են 50 տոկոս և պայուսակն այժմ արժե 75 000 դրամ»,- Sputnik Արմենիայի հետ զրույցում ասում է մի դպրոցական տղայի մայր, որը չցանկացավ ներկայանալ և հավելում, որ կարող էր նաև 10.000-15.000 դրամանոց պայուսակ գնել, սակայն մի քանի օր անց շղթան կփչանար:
6-7 տարեկան տղա երեխաների համար շատ կարևոր է, որ իրենց պայուսակի վրա պատկերված լինի սիրված մուլտհերոսը կամ նախընտրելի ֆուտբոլային թիմը, իսկ աղջիկների համար սիրելի են մնում Barby-ն, Winx-ի փերիները կամ Hello Kitty-ն: Հարցումը ցույց է տվել, որ ծնողների մեծամասնությունը, թեև փորձում է հակազդել երեխաների ցանկությանը, բայց, այնուամենայնիվ, մեծամասամբ գնում են զիջման:
Հրազդանի և Աբովյանի տարբեր տոնավաճառներում դպրոցական պայուսակներ կարելի է ձեռք բերել նվազագույնը 8000 դրամով, իսկ Երևանում` նվազագույնը 10.000 դրամով:
Պայուսակում պետք է լինեն տետրեր, օրագիր, գրչատուփ, գրիչներ, մատիտներ, ռետիններ և այլ գրենական պարագաներ: 12-էջանոց տետրը կարելի է ձեռք բերել միջինը 60 դրամով: Պահանջվում են նաև ընդհանուր տետրեր, որոնց արժեքը 150 դրամ է (40 էջ) և 350 դրամ (96 էջ) : Պետք է ձեռք բերել գրքերի կազմեր (1 հատը` 150 դրամ), ինչպես նաև տետրերի կազմեր (1 հատը` 20 դրամ):
Գրենական պիտույքների գները, սեզոնային գործոնով պայմանավորված, բարձրացել են։ Գրչատուփերի գինը տատանվում է 500-1500 դրամի սահմաններում, օրագիրը` 150-1400 դրամի, տարբեր գրիչների հավաքածուն` 350-800 դրամ սահմաններում։ Գունավոր մատիտներ կարելի է ձեռք բերել 250-1200 դրամ ունենալու դեպքում, քանոններ և ռետիններ` 80- 500 դրամ, մկրատ` 200-500 դրամ, գունավոր թղթեր` 100-600 դրամ, իսկ պլաստիլին` 200- 650 դրամ ունենալու դեպքում։ Կոպիտ հաշվարկներով` 2000 մինչև 7000 պետք է ունենալ գրենական պիտույքներ ձեռք բերելու համար։
Գոնե սեպտեմբերի 1–ին աշակերտներն ու նրանց ծնողները նախընտրում են սպիտակ վերնաշապիկ, սև կամ կապույտ անդրավարտիք կամ կիսաշրջազգեստ կրել ու անպայման` նոր։ Սպիտակ վերնաշապիկ Երևանի տոնավաճառներից կարելի է ձեռք բերել միջինը 5000-8000 դրամով, վերնաշապիկին փոխարինող սպիտակ բլուզը՝ նվազագույն 3500 դրամով: Տաբատներն արժեն 9.000-15.000 դրամ, իսկ կիսաշրջազգեստները՝ միջինը 5000- 10 000 դրամ: Տղա երեխայի կոշիկները կարելի է գնել միջինը 7500 -10 000 դրամով, իսկ աղջիկներինը՝ 8 000-15.000 դրամով: Աղջիկների գուլպաները և ներքնազգեստը միասին ծնողի վրա միջինը կնստեն 7000 դրամ:
«Ես այս տարի 5 դպրոցական երեխա ունեմ և ծախսել եմ 200.000 դրամից ավելի»,-ասում է բազմազավակ հայրիկն ու հոգոց հանում:
Երեք դպրոցահասակ դուստրերի մայրն ասում է, որ դժվարությամբ, բայց ամեն տարի էլ նոր շորեր գնում են և հավելում, որ հագուստը որակ չունի, մի քանի անգամ լվանալուց հետո էլ հագնել չի լինում:
Աշակերտները կազատվե՞ն ծանր պայուսակից ու դրա հետևանքներից. 48 դասագիրք երկհատորանի կլինեն
Մեկ ուրիշ մայրիկ էլ ասում է, որ այսօրվա երեխաների հետ ավելի դժվար է: «Փոքր աղջիկս ամեն ինչ ինքն է ուզում ընտրել: Մեծ աղջիկներս այդպիսին չէին: Դպրոցն ավարտեցին բարեկամներիս ուղարկած կամ նվիրած հագուստով: Իսկ կրտսերս ամեն ինչի նորն է ուզում: Ստացածս ընդամենը 55.000 դրամ է»,- ասում է աղջկա ձեռքը բռնած մայրիկը՝ արժանանալով դստեր դժգոհ ու նեղացած հայացքին:
Նույն պատկերն ունենք Հրազդանում: Հարցվածները նշել են, որ մեկ երեխային դպրոց ուղարկելու համար ծախսել են ամսական միջին եկամտի մոտ 40 տոկոսը: Հրազդանցիները դժգոհում են, որ երևանցիներից ավելի քիչ եկամուտ են ստանում, բայց ուսումնական ապրանքները գնում են գրեթե նույն գներով, ինչ Երևանում։
Ի տարբերություն Երևանի, Հրազդանում կան հարցվածներ, ովքեր նոր ուսումնական տարվա գնումների որոշ մասն անում են կանխիկով, մյուս մասը՝ պարտքով վերցնում՝ պարտավորվելով տարվա ընթացքում մաս-մաս վճարել։
Աբովյանի տոնավաճառներում համեմատած գներն ավելի մեղմ են. վերոնշված հագուստը կարելի է ձեռք բերել հետևյալ գներով. վերնաշապիկ 3000-5000 դրամ, տաբատ 7000-12000 դրամ, կիսաշրջազգեստ 5000-8000 դրամ, կոշիկներ 6000-10000 դրամ:
Հաշվի առնելով, որ ՀՀ-ում նվազագույն աշխատավարձը 55.000 դրամ է, կարելի է միայն պատկերացնել, թե քանի երեխա է «պարտքով» դպրոց գնալու:
Հայաստանում 10 000 ուսուցիչ կրճատվել չի կարող. Խաչատրյանը` ուսուցիչների դեֆիցիտի մասին
Մինչ դպրոցականները ուրախ պատրաստվում են նոր ուսումնական տարվան, ծնողները զգուշորեն հաշվում են ընտանեկան բյուջեին հասցված վնասները:
Վերջապես, ինչ սեպտեմբերի 1 առանց ծաղկեփնջի և շնորհավորանքների: Իսկ մեր երկրում, սովորաբար, նման օրերին ծաղիկների ու ծաղկեփնջերի գներն աճում են` չնայած ավելի լայն սպառմանը։ Այնպես որ, գոնե 5000 դրամ գումարեք ձեր նախատեսած ծախսին`սեպտեմբերի մեկն ավելի գեղեցիկ դարձնելու և ձեր բալիկին գիտելիքներ տվող ուսուցչին ծաղկեփնջով շնորհավորելու համար։
