ԵՐԵՎԱՆ, 27 օգոստոսի — Sputnik. Դիզիվիոնի համար նախատեսված դիվառելիքն ու բենզինը հափշտակած փոխգնդապետը կալանավորվել է։ Այս մասին հայտնում է ՀՀ քննչական կոմիտեն։
«ՀՀ ՊՆ N զորամասի դիվիզիոնի հրամանատարը, 2016թ. ապրիլից մինչև 2019թ. հուլիսն ընկած ժամանակահատվածում, իր հրամանատարության ներքո գտնվող դիվիզիոնի համար նախատեսված, իրեն վստահված միջոցներից՝ անձեռնմխելի պաշարից, յուրացնելու եղանակով հափշտակել է դիզվառելիք և բենզին»,–նշված է հաղորդագրության մեջ։
Նշվում է, որ նա գողացել է 9.538.457 ՀՀ դրամ ընդհանուր արժողությամբ՝ 19.950 լիտր ձմեռային դիզվառելիք և 100 լիտր բենզին, իսկ ընթացիկ վառելիքաքսուքային միջոցներից՝ 900 լիտր բենզին, որը հետագայում իրացրել է, իսկ ստացված գումարը տնօրինել:
Բացի այդ, փոխգնդապետը, տեղեկանալով իր հրամանատարության ներքո գտնվող ռադիոլոկացիոն կայանից կատարված հափշտակության դեպքի մասին, չարաշահելով պաշտոնեական դիրքը, այդ մասին սահմանված կարգով վերադաս հրամանատարությանը չի հայտնել։ Այդ պատճառով հափշտակության դեպքն իրավապահ մարմիններին հայտնի է դարձել ամիսներ անց:
Ձեռք բերված բավարար ապացույցների համակցությամբ՝ փոխգնդապետին մեղադրանք է առաջադրվել՝ ՀՀ քրեական օրենսգրքի 179-րդ հոդվածի 3-րդ մասի 1-ին կետով, այն է` յուրացնելը կամ վատնելը, և 375-րդ հոդվածի 1-ին մասով, այն է` իշխանությունը չարաշահելը, իշխանազանցությունը կամ իշխանության անգործությունը, նախատեսված հանցավոր արարքներ կատարելու համար:
Վերջինիս նկատմամբ որպես խափանման միջոց ընտրվել է կալանավորումը:
Քրեական գործով նախաքննությունը շարունակվում է:
