ԵՐԵՎԱՆ, 21 օգոստոսի — Sputnik. Պետական վերահսկողական ծառայության պետ Դավիթ Սանասարյանի նկատմամբ հարուցված քրեական գործի նախաքննությունն ավարտվել է։ Տեղեկությունները մամուլում հաստատել է Սանասարյանի փաստաբան Ինեսա Պետրոսյանը։
Ուրախ եմ, որ Սանասարյանը քննությանը տրամադրել է իմ ու իր նամակագրությունը. Արսեն Թորոսյան
Փաստաբանը նշել է, որ քրեական գործի նյութերը նոր են տրամադրվում կողմերին` ծանոթանալու համար։ Ուստի իրենք միջնորդել են 20 օր ժամանակ տրամադրել դրա համար։ Միայն նյութերին ծանոթանալուց հետո կհայտնեն իրենց դիրքորոշումը։
Մինչ այդ Ինեսա Պետրոսյանը հայտնել է միայն, որ իր պաշտպանյալին առաջադրված մեղադրանքը չի փոխվել։ Փոփոխություններ են եղել մեղադրանքի ձևակերպումների մեջ:
Հիշեցնենք, որ ԱԱԾ–ում քննվող քրեական գործով ապրիլի 18-ին Դավիթ Սանասարյանին մեղադրանք է առաջադրվել պաշտոնեական լիազորությունները չարաշահելու համար և որպես խափանման միջոց ընտրվել է չհեռանալու մասին ստորագրությունը։
Պետական վերահսկողական ծառայության գնումների վերահսկողության վարչության պետ Սամվել Ադյանը և ՊՎԾ մեկ այլ աշխատակից՝ բժշկական սարքավորումների մասնագետ Գևորգ Խաչատրյանը, փետրվարի 26-ին ձերբակալվել էին բժշկական հաստատությունների կողմից հայտարարված հեմոդիալիզի պարագաների մրցույթներին ենթադրյալ միջամտության դեպքով հարուցված քրեական գործի շրջանակում։
ԱԱԾ–ում քննվող քրեական գործի շրջանակում մեղադրանք էր առաջադրվել նաև Դավիթ Սանասարյանին` ՀՀ քրեական օրենսգրքի 308-րդ հոդվածի 1-ին մասով (Պաշտոնեական լիազորությունները չարաշահելը)։
Նրա նկատմամբ խափանման միջոց էր ընտրվել չհեռանալու մասին ստորագրությունը։ Ժամանակավորապես դադարեցվել էր նաև նրա պաշտոնավարումը։
Դավիթ Սանասարյանը ԱԱԾ–ի առաջադրած մեղադրանքները շինծու էր որակել` հայտարարելով, որ պատրաստ է իր ձեռքը կտրել, եթե հրապարակվի այն տեսանյութը, որտեղ ինքը կաշառք է վերցնում։
