ԵՐԵՎԱՆ, 21 օգոստոսի — Sputnik. Գեղհովիտում այն ամենն, ինչն առնչվել է սիբիրյան խոցով հիվանդ կենդանու` կովի մսեղիքի հետ, այրվել է, իսկ տարածքը` գոմը, տները, ախտահարվել։ Այս մասին Sputnik Արմենիայի հետ զրույցում ասաց ՀՀ առողջապահության նախարարության «Հիվանդությունների վերահսկման և կանխարգելման ազգային կենտրոնի» վարակիչ հիվանդությունների համաճարակաբանության բաժնի պետ Լիանա Թորոսյանը։
«Կենցաղային իրերը` դանակներ, տախտակներ, կաթսաներ, ինչպես նաև կովի մսեղիքն արդեն այրվել են։ Նախկինում եղել են դեպքեր, որ բնակիչները դեմ լինեն կենցաղային իրերի այրմանը, սակայն այս դեպքում անգամ օգնել են` տալով այն ամենն, ինչ առնչվել է մսի հետ»,–ասաց մասնագետը։
Հայտնել էինք, որ Մարտունու շրջանի Գեղհովիտ համայնքում սիբիրյան խոցի դեպքեր են հայտնաբերվել. «Նորք» բժշկական կենտրոն 5 մարդ է տեղափոխվել։
Մասնագետի խոսքով` խնդիրն այն է, որ սիբիրյան խոցի հարուցիչը պատիճավորվում է և հողի տակ կարող է մնալ մինչև մեկ դար։ Ուստի, նման դեպքերում այրումը պետք է իրականացվի հատուկ տարածքում, որը պետք է ցանկապատել և հետագայում որպես արոտավայր չօգտագործել։
Հայաստանում աֆրիկյան ժանտախտ չկա. ինչո՞ւ են խոզերը սատկել Սյունիքում
Ըստ Թորոսյանի` Գեղհովիտում բժշկական խիստ հսկողություն է իրականացվում(ջերմաչափում, մաշկի զննություն) հատկապես նրանց հանդեպ, որոնք ինչ–որ կերպ առնչվել են սիբիրյան խոցով հիվանդ կենդանու հետ։ Սիբիրյան խոցը 14 օր գաղտնի շրջան է ունենում, և հսկողությունը կսահմանվի այնքան ժամանակ` մինչև մասնագետները կհամոզվեն, որ վարակի նոր դեպքեր չկան։
Ինչ վերաբերում է արդեն իսկ վարակվածներին, Թորոսյանը նշեց, որ նրանք համապատասխան բուժում են ստանում և դրական դինամիկա կա։ Նա, ի դեպ, հայտնեց, որ հիվանդների թվում երեխա չկա։
Թորոսյանը տեղեկացրեց նաև, որ, բարեբախտաբար, Գեղհովիտում հայտնաբերված սիբիրախտի բոլոր դեպքերն էլ մաշկային են, որի ճիշտ բուժման դեպքում հնարավոր կլինի խուսափել բարդություններից։ Իսկ բարդությունը հիվանդության` մաշկային ձևից աղիքայինի վերածվելն է, որի կարող է նաև մահվան ելքով ավարտվել։
«Սիբիրյան խոցն, ի դեպ, մանրէային ծագման վարակիչ հիվանդություն է։ Մարդիկ վարակվում են խոշոր և մանր եղջերավոր կենդանիներից։ Մարդը մարդուն չի կարող վարակը փոխանցել։ Հիվանդության հարուցիչները մարդու օրգանիզմ են ներթափանցում մաշկի ամբողջականության խախտման դեպքում, երբ, օրինակ, կա քերծվածք և մարդը կենդանու մսեղիքի հետ գործ ունի»,–ասաց նա։
Նոր ստուգումներ Գյումրիում. մսի վաճառքով զբաղվողներին զգոն են պահում. լուսանկարներ
Բացի այդ, վարակը մարդու օրգանիզմ կարող է թափանցել հիվանդ կենդանու միսն ուտելով։ Թորոսյանը հայտնեց, որ հիվանդ կենդանու չի կարելի օգտագործել ոչ մի դեպքում` ոչ կոտլետի, ոչ երշիկի, ոչ էլ անգամ ղավուրմայի(եթե անգամ, շատ է եփվել) տեսքով։ Մասնագետը հորդորում է պատահական վայրերից միս չգնել, միայն խանութներից և միայն այն դեպքում, երբ կա կենդանու առողջական վիճակը հաստատող տեղեկանք։
Քարահունջում արդեն 200 խոզ է սատկել. նոր դեպքեր են գրանցվել
Հիշեցնենք, որ Սննդամթերքի անվտանգության տեսչական մարմնի ղեկավար Գեորգի Ավետիսյանը հայտնել էր, որ Գեղհովիտում սիբիրյան խոցով հիվանդ կով են մորթել ու մոտ 25 ընտանիքի է բաժանվել։ Ավելին, բնակիչները մոտավոր 20-30 կգ միս արդեն հասցրել են օգտագործել։
