ԵՐԵՎԱՆ, 17 օգոստոսի-Sputnik. ՀՀ քաղաքացին առաջիկայում կկարողանա վերամիավորվել Ռուսաստանում ապրող ընտանիքի հետ: Այս մասին տեղեկացնում են Հայաստանի մարդու իրավունքների պաշտպանի գրասենյակից՝ նշելով, որ նրա նկատմամբ ՌԴ մուտք գործելու արգելքը վերացված է:
Մոսկվա կատարած այցի ընթացքում մարդու իրավունքների պաշտպան Արման Թաթոյանը և ՌԴ-ում մարդու իրավունքների հանձնակատար Տատյանա Մոսկալկովան քննարկել են Ռուսաստան արտագնա աշխատանքի մեկնած կամ այնտեղ բնակվող մեր հայրենակիցներին հուզող մի շարք հարցեր:
Քննարկմանը մասնակցել են նաև Ռուսաստանի Դաշնությունում Հայաստանի արտակարգ և լիազոր դեսպան Վարդան Տողանյանը, Ռուսաստանի հայերի միության նախագահ Արա Աբրահամյանը։ Նա նույնպես բարձրացրել է հայերին հուզող առաջնային կարևորության հարցեր, որոնց լուծման համար քաղաքացիները պարբերաբար դիմում են իրենց։
Հանդիպման օրակարգում եղել են հարցեր, որոնք վերաբերում են ՌԴ-ում ու Հայաստանում աշխատած ժամանակահատվածի հաշվարկմանը միասնական կենսաթոշակային ստաժով, Ռուսաստան մեկնելու դեպքում հանրակրթական դպրոցներում ու նախադպրոցական հաստատություններում երեխաների ուսուցմանը, ՌԴ-ի տարածքում հայկական վարորդական իրավունքի վկայականների կիրառությանը և այլն: ՌԴ մարդու իրավունքների հանձնակատարը պատրաստակամություն է հայտնել իր իրավասության շրջանակում աջակցել ՀՀ քաղաքացիների կամ ազգությամբ հայերի աշխատանքային, սոցիալական, առողջապահական, կենսաթոշակային, կրթական և այլ իրավունքներին առնչվող խնդիրների լուծմանը։
Ադրբեջանում հայտնված զինծառայողի հարցով Թաթոյանը խոսել է Կարմիր խաչի ներկայացուցչի հետ
Հանդիպման ընթացքում քննարկվել են նաև Սոչիի օդանավակայանում աշխատող հայերի աշխատանքից ազատելու մասին մամուլում տարածված տեղեկությունները։
Կազմակերպվել է նաև ՌԴ-ում բնակվող մեր հայրենակիցների ընդունելություն, որոնք ներկայացրել են իրենց հուզող խնդիրները։
